ჟოზე მოურინიომ "მანჩესტერ იუნაიტედის" ფეხბურთელების მებრძოლი სული შეაქო, რისი დახმარებითაც მისმა შეგირდებმა "ჩელსის" 2-0 სძლიეს.

მარკუს რეშფორდისა და ანდერ ერერას მიერ პირველი და მეორე ტაიმის საწყის წუთებზე გატანილმა გოლმა "იუნაიტედს" ოთხეულისთვის ბრძოლაში მნიშვნელოვანი გამარჯვება მოუპოვა.

მატჩის შემდეგ მოურინიო "სქაი სპორტსა" და "იუნაიტედის" ოფიციალურ ტელევიზიას ესაუბრა.

გუნდის შემადგენლობა

როცა ჰკითხეს, სასტარტო თერთმეტეულზე ფეხბურთელთა გადაღლილობამ ხომ არ იქონია გავლენა, მოურინიომ უპასუხა: "შესაძლოა, არ დაგვისვენია. ალბათ, უფრო ის გუნდი ავირჩიეთ, რომელიც, ჩვენი აზრით, საუკეთესო იყო."

ტაქტიკის მიზეზი

"ინგლისის თასის ეგიდით "სტემფორდ ბრიჯზე" გამართულ მატჩში ამავე ტაქტიკით ვითამაშეთ და მატჩს ბოლომდე ვაკონტროლებდით, სანამ ფეხბურთელი არ გაგვიძევეს. "ჩელსიმ" უპირატესობა მხოლოდ იმის ხარჯზე მოიპოვა, რომ გადაწყვეტილების საფუძველზე მეორე ტაიმი და პირველი ტაიმის რამდენიმე წუთი კაცნაკლულმა ვითამაშეთ, მაგრამ ვიცოდით, რომ ჩვენი სტილით თამაში მათ საქმეს გაურთულებდა."

რეშფორდმა ფანტასტიკურად ითამაშა

"ფანტასტიკურად კარგად ითამაშა. "სტემფორდ ბრიჯზე" სათასო მატჩშიც კარგად გამოიყურებოდა. 10 კაცით თამაშის დროსაც კი ზუსტად იგივე მომენტი ჰქონდა გოლის გასატანად, რადგან უფრო სწრაფია, ვიდრე მათი მცველები და მათ უკან ჩარბენა შეუძლია. დღეს კი გაიტანა და თანაც მატჩის დასაწყისში, რამაც გუნდს უფრო მეტი თავდაჯერებულობა და სტაბილურობა შემატა. ეს ძალიან მნიშვნელოვანი იყო და ბავშვმა ფანტასტიკურად კარგად ითამაშა.

პოზიტიური სიტყვები ერერას მისამართით

"სათასო მატჩში რთული პერიოდი ჰქონდა, რადგან მსაჯმა პრობლემა შეუქმნა. დღევანდელი თამაში ძალიან ჰგავდა წინას, გუნდი იმავე სტილში თამაშობდა, მაგრამ სხვაობა ის იყო, რომ 11 ფეხბურთელით ვიყავით 90 წუთის განმავლობაში."

ბიჭების გამო ბედნიერია

"ვფიქრობ, ყველამ ის გააკეთა, რაც უნდა გაეკეთებინათ. ყველა ბევრს იბრძოდა. ბაიი და როხო, ვფიქრობ, განსაკუთრებულ აღნიშვნას იმსახურებენ, რადგან სმოლინგისა და ჯონსის ტრავმის შემდეგ აბსოლუტურად ყველა მატჩი ჩაატარეს. გუნდითა და შედეგით მართლაც ბედნიერი ვარ, რადგან "მანჩესტერ სიტისა" და "ლივერპულის" გამარჯვებებმა ჩვენც აუცილებლად მოსაგები მატჩი დაგვიტოვა. ფრეც კი არ იქნებოდა კარგი შედეგი ჩვენთვის, ასე რომ, მართლაც ბედნიერი ვარ ბიჭების გამო და ჩვენ გამოც, იმიტომ, რომ ჩემპიონთა ლიგაზე მოსახვედრი ორივე კარი ღიაა."

ორივე ფრონტზე ვიბრძოლებთ

"პრემიერ ლიგაში ჯერ ვერ დავნებდები. უნდა ვცადო და ერთ დღეს ევროპა ლიგაზე თუ ვითამაშებთ, მაგრამ პრემიერ ლიგაში ძალიან დიდი ჩამორჩენა გვექნება, პრიორიტეტი უნდა განვსაზღვროთ და ვერავინ გაგვაკრიტიკებს იმის გამო, ჩემპიონატის ბოლო მატჩებს სხვანაირად თუ მივუდგებით. მაგრამ სანამ მათემატიკურად შესაძლებელია, ყველაფერი უნდა გავიღოთ."