ჟოზე მოურინიო აღიარებს, რომ "ჩელსის" ხელს უწყობს ევროტურნირებზე არყოფნა, მაგრამ ამის მიუხედავად არ სურს, ანტონიო კონტეს ღვაწლი დააკნინოს.

მოურინიოს "მანჩესტერ იუნაიტედი" ორშაბათს ინგლისის თასის მეოთხედფინალურ მატჩს ჩაატარებს პორტუგალიელი ყოფილი გუნდის წინააღმდეგ, მაგრამ ჟოზე აღნიშნავს, რომ ეს შეხვედრა მისთვის არაფრით არის გამორჩეული.

გასულ სეზონში ინგლისის ჩემპიონ "ჩელსის" წარმოუდგენლად ცუდი შედეგები ჰქონდა პრემიერ ლიგაში, რაც კონტემ აღმოფხვრა და გუნდი პირველ ადგილზე დააბრუნა.

მოურინიოს კი მიაჩნია, რომ ამაში იტალიელს ხელი "ლურჯების" იოლმა განრიგმაც შეუწყო.

"ყველაზე რთული ნაწილი სავარჯიშო მოედანზე მუშაობისთვის განკუთვნილი დროა, მათ კი ეს დრო აქვთ.

ვიცი, რომ კონტემ რამდენიმე კვირის წინ თქვა, ჩემი ბრალი არ არის, ევროპულ ტურნირებზე რომ არა ვართო - ეს ჩემი ბრალია, ჩემი და ფეხბურთელების.

მაგრამ რეალობა ის არის, რომ მის ხელთაა სიტუაცია, რომელიც მუშაობის, დასვენების, მოდუნების, კონცენტრაციის სხვა რამეზე გადატანის, მოგზაურობის, არდადეგების მოწყობის, ამერიკაში რამდენიმე დღით წასვლისა და სიამოვნების მიღების საშუალებას აძლევს, მათ ამ ყველაფრისთვის აქვთ დრო, ასე რომ, პრივილეგირებულ პოზიციაში იმყოფებიან, ასეთივე პრივილეგია ჰქონდა "ლივერპულს" რამდენიმე წლის წინ, როცა თითქმის მოიგეს პრემიერ ლიგა.

მაგრამ არ ვამბობ, რომ შექებას არ იმსახურებენ. ვიცი, რაც გავაკეთე "ჩელსიში", მაგრამ მე არ ვნანობ და ცუდ შეგრძნებებს საერთოდ არ ვიხსენებ".

"იუნაიტედის" მატჩის "ჩელსისთან" ევროპა ლიგის 1/8 ფინალური შეხვედრების შუალედში უწევს და მოურინიო აცხადებს, რომ ინგლისური ფეხბურთის ყველაზე ძველი ტურნირი მისი პრიორიტეტი არ არის.

"მხოლოდ ერთი ჩვეულებრივი მატჩია. ვარ თუ არა უფრო უბედური, რომ "ჩელსის" წინააღმდეგ წავაგეთ? არა. ვიქნებით თუ არა უფრო ბედნიერი, "ჩელსის" დამარცხების შემთხვევაში? არა.

ასე რომ, მხოლოდ მორიგი მატჩია, რომელიც ცუდ დროს გვაქვს, რადგან ევროპა ლიგა არის ტურნირი, რომელსაც ჩემპიონთა ლიგის საგზურის მოცემა შეუძლია, ინგლისის თასს კი არა. ასე რომ, ევროპა ლიგა უფრო მნიშვნელოვანია, ვიდრე ინგლისის თასი."

წყარო: goal.com