იტალიელი მწვრთნელი გოლის აღნიშვნისთვის პორტუგალიელმა გააკრტიკა, როცა ბოლოს ერთმანეთს დაუპირისპირდნენ, მაგრამ ანტონიო კონტე ორშაბათს არ აპირებს ემოციების შეკავებას.

"ჩელსის" მთავარი მწვრთნელი ინგლისის თასის მეოთხედფინალში საკუთარ მოედანზე უმასპინძლებს ჟოზე მოურინიოს "მანჩესტერ იუნაიტედს".

ამ გუნდების ბოლო დაპირისპირება პრემიერ ლიგაში ლონდონელთა გამარჯვებით 4-0 დასრულდა. მეოთხე გოლის ემოციურად აღნიშვნის შემდეგ მოურინიო კონტესთან მივიდა და უთხრა, რომ ასეთი აღნიშვნა მხოლოდ 1-0 ანგარიშზეა მიზანშეწონილი და არა 4-0-ზე.

მაგრამ იტალიელი ამ შენიშვნის მიუხედავადაც არ აპირებს თავისი ემოციების შეკავებას, რადგანაც თავის აღნიშვნაში ფეხბურთისადმი ლტოლვას ავლენს.

როცა ჟურნალისტებმა ჰკითხეს, ესაუბრა თუ არა მას შემდეგ მოურინიოს, კონტემ უპასუხა: "არა, მაგრამ არა მგონია, ეს მნიშვნელოვანი იყოს.

მასთან გასარკვევი არაფერი მაქვს. ვფიქრობ, "ჩელსიში" გატარებული პერიოდის განმავლობაში ვაჩვენე, რომ ფეხბურთს დიდი ვნებით ვეკიდები.

ჩემი ფეხბურთელები მატჩზე, მოედანზე, ყოველ თამაშში გასაკეთებელ საქმეზე არიან კონცენტრირებულნი. გონებრივი თამაშები გამარჯვებას ვერ მოგიტანს.

ოქტომბერში გამართულ მატჩამდე დარწმუნებული ვიყავი, რომ დიდ გუნდს ვუპირისპირდებოდით. ახლაც ასეა.

ოქტომბერში ჩვენი მომავალი არ ვიცოდით. ახლა მარტია და ცხრილის სათავეში ვართ".

კონტეს თქმით, მატჩის წინ "ჩელსისთვის" ფავორიტის სტატუსის მინიჭებას არავითარი მნიშვნელობა არ აქვს და არ აპირებს, წინასწარ განაცხადოს, ზლატან იბრაჰიმოვიჩის არყოფნა დისკვალიფიკაციის გამო გადამწყვეტი იქნება თუ არა.

"მატჩის შემდეგ გეტყვით იბრაჰიმოვიჩის თაობაზე. იმედი მაქვს, ჩვენს ფავორიტობას მოედანზე დავადასტურებთ და არა სიტყვებით.

ამჟამად ყველა ჩემი ფეხბურთელი ხელმისაწვდომია, მაგრამ შაბათს და კვირას ორი სავარჯიშო სესია გვაქვს გასამართი.

ყველაზე მნიშვნელოვანი მოედანია, გუნდის მომზადება სწორად. ეს არის ყველაზე მნიშვნელოვანი."

წყარო: goal.com