"ევერტონის" მთავარმა მწვრთნელმა, რონალდ კუმანმა მიანიშნა, რომ სეზონის ბოლოს "მანჩესტერ იუნაიტედიდან" უეინ რუნის შეძენას ეცდება.

რუნიმ გასულ კვირაში საჯაროდ აღიარა სხვა კლუბებისგან მიღებული შეთავაზებები, რომლებიც "ოლდ ტრაფორდზე" დარჩენის სურვილით უარყო.

კლუბის კაპიტნის გრძელვადიანი მომავალი სპეკულაციების საგანი ხდება, რამეთუ 31 წლის ფეხბურთელი სათამაშო პრაქტიკას ვეღარ იღებს და მან ისეთ მნიშვნელოვან მატჩშიც კი ვერ ითამაშა, როგორიც ლიგის თასის ფინალია.

რუნის თავის ყოფილ კლუბს უკავშირებენ და კუმანმა აღნიშნა, რომ ინგლისის ნაკრების კაპიტანს სიამოვნებით მიიღებდა თავისი გუნდის რიგებში.

"ჯერ კიდევ მიმაჩნია, რომ უეინ რუნი მაღალ დონეზე თამაშობს და კარგი არჩევანი გააკეთა, რომ "მანჩესტერ იუნაიტედსა" და პრემიერ ლიგაში დარჩა.

ჯერ კიდევ შეუძლია ორი თუ სამი წლის განმავლობაში მაღალ დონეზე თამაში. რა მოხდება სეზონის ბოლოს, არ ვიცი. ჩემი აზრით, ერთ-ერთი ფეხბურთელია, რომელიც "ევერტონს" გააძლიერებდა.

ყველაფერი იმაზეა დამოკიდებული, რა მოსწონს ფეხბურთელს, რა სჭირდება "მანჩესტერ იუნაიტედს" და ამაში ჩვენ ვერ ჩავერევით. ჩვენ ნებისმიერ ფეხბურთელს მივესალმებით, რომელსაც "ევერტონის" გაძლიერება შეუძლია", - განაცხადა ჰოლანდიელმა.

წყარო: goal.com