"მანჩესტერ იუნაიტედის" მწვრთნელმა, ჟოზე მოურინიომ ზლატან იბრაჰიმოვიჩი შეაქო და მასზე საუბრისას აზრი გამოთქვა, რომ ახლა გაცილებით უკეთესი ფეხბურთელია, ვიდრე "ინტერში" ყოფნისას იყო.

"იუნაიტედში" გადასვლის შემდეგ იბრაჰიმოვიჩი შთამბეჭდავ ფორმაში იმყოფება და ყველა ტურნირზე ჩატარებულ 37 მატჩში 25 გოლი აქვს გატანილი. თავდამსხმელის პირდაპირი მოვალეობის შესრულების გარდა მოურინიო შვედის თამაშითაც არის მოხიბლული.

"ვფიქრობ, გაცილებით უკეთესია ახლა, ვიდრე "ინტერში" ყოფნის დროს. უფრო გაწონასწორებულია, უფრო ჭკვიანია და უფრო კარგად ესმის თამაში. არა მხოლოდ შემსრულებელია, არამედ გოლებსაც ქმნის.

ლიდერია. განსაკუთრებულ დამოკიდებულებასა და ზრუნვას იჩენს ახალგაზრდა ბიჭების მიმართ. ფიზიკური თვალსაზრისით 40 წლამდე ითამაშებდა.

მაგრამ საქმე მხოლოდ ფიზიკურობაში არ არის. მენტალურობასაც აქვს მნიშვნელობა. ერთ დღეს თავის გადაწყვეტილებას მიიღებს და საფეხბურთო სამყარო ამას შეეგუება. რასაც ის აკეთებდა, ფენომენალურია. მაგრამ ერთ დღეს გაიღვიძებს და იტყვის, რომ საკმარისია.

გაუმართლა, რომ თავის კარიერაში სერიოზული ტრავმა არ მიუღია. მაგრამ შეუძლებელი არაფერია, "იუნაიტედში" კიდევ სამი ან ხუთი წელი შეძლებს თამაშს", - განაცხადა მოურინიომ.

წყარო: goal.com