"მანჩესტერ იუნაიტედი" კვირას ლიგის თასის ფინალის გასამართად "უემბლიზე" ჩავა, სადაც ტიტულის მოგებას ეცდება და რეკორდულ შედეგს გაიმეორებს.

"იუნაიტედმა" 48-ჯერ ითამაშა ეროვნულ სტადიონზე, მომდევნო შეხვედრა კი 49-ე იქნება, რაც "არსენალთან" ერთად საუკეთესო შედეგის ტოლფასია. "უემბლიზე" ჩატარებული მატჩებით მესამე ადგილზე "ლივერპული" იმყოფება, რომელმაც 38-ჯერ იასპარეზა აქ, ხოლო შემდეგი სიაში ლონდონური კლუბები "ტოტენჰემი" და "ჩელსი" არიან 30 და 29 მატჩით შესაბამისად.

"იუნაიტედის" მიერ ჩატარებული 48 მატჩიდან 6 ლიგის თასის ფინალზე მოდის, მათგან 3 კი "წითლებმა" მოიგეს, 18-18 მატჩი ინგლისის თასისა და ქომუნითი/ჩერითი შილდის ფინალებზე მოდის, ხოლო 4 მატჩი ინგლისის თასის ნახევარფინალებზე.

დანარჩენი 2 შეხვედრა კი ევროპული თასის/ჩემპიონთა ლიგის ფინალებზე მოდის, რომლებიც 1968 და 2011 წელს კონტრასტული შედეგით დასრულდა.

ჟოზე მოურინიოს შეგირდებს მიმდინარე სეზონში "არსენალის" გადასწრების შანსი აქვთ, თუკი ინგლისის თასზე "ჩელსის" დაამარცხებენ და ნახევარფინალში გავლენ, სადაც გამარჯვების შემთხვევაში ფინალში კვლავ "უემბლიზე" თამაშის შანსი ექნებათ.

"უემბლიზე" ჩვენი შედეგი საკმაოდ წარმატებულია, რამეთუ ჩატარებული 48 შეხვედრიდან გუნდმა მხოლოდ 15 წააგო, საერთო ჯამში კი 17 გამარჯვება გვაქვს მოპოვებული, რაც პროცენტულად 43.75-ს შეადგენს.

წყარო: manutd.com