ენტონი მარსიალმა "მანჩესტერ იუნაიტედისადმი" თავისი სიყვარული გამოხატა და გუნდში რაც შეიძლება დიდხანს დარჩენის სურვილი გამოთქვა.

ფრანგი ფეხბურთელი თავის სამშობლოში დაბრუნდა, რათა "სენტ-ეტიენთან" მატჩში მიიღოს მონაწილეობა და შეხვედრის წინ გამართულ პრესკონფერენციაზე მან ჟურნალისტების შეკითხვებს უპასუხა, სადაც კლუბისა და გულშემატკივრებისადმი თავისი დამოკიდებულება გამოხატა.

"მიყვარს ეს კლუბი. მიყვარს "მანჩესტერ იუნაიტედი", მისი გულშემატკივრებიც მიყვარს. ისინი ძალიან მიჭერენ მხარს და ამისგან სიამოვნებას ვიღებ. ვცდილობ, რაც შეიძლება კარგად ვითმაშო, რათა ისინი კმაყოფილები და ბედნიერები იყვნენ. ამ კლუბში რაც შეიძლება დიდხანს დარჩენა მინდა", - განაცხადა მარსიალმა.

ენტონის თავისი ფორმის შესახებაც ჰკითხეს და ახალგაზრდა ფორვარდმა დამაჯერებლად უპასუხა: "შარშან ბევრს ვთამაშობდი. ზედიზედ რამდენიმე მატჩს ვატარებდი, მაგრამ ახლაც სიამოვნებას ვიღებ ჩემი თამაშისგან და ველოდები. ბევრი ფეხბურთელისგან შემდგარი კარგი ჯგუფი გვაქვს, ამიტომ მწვრთნელი შემადგენლობის გადახალისებას ცდილობს ყოველ მატჩში. ჩვენ მხოლოდ მზად უნდა ვიყოთ მოედანზე გასასვლელად."

გაუმჯობესებისადმი სწრაფვის შესახებ საუბრისას განაგრძო: "ბევრს ვშრომობ. ძალიან ბევრს ვშრომობ. ირგვლივ დიდებული ფეხბურთელები მახვევია. ყოველი სავარჯიშო სესიიდან რაღაცის სწავლას ვცდილობ და ამაში ძალიან გამიმართლა. ამ ფეხბურთელებთან ერთად თამაშისა და ვარჯიშის საშუალება რომ მაქვს, იღბლიანი ვარ. მხოლოდ კონცენტრაციის შენარჩუნებას, მაქსიმუმის გაკეთებას ვცდილობ და დარწმუნებული ვარ, მომდევნო სეზონი უკეთესი იქნება."

მარსიალმა ასევე განაცხადა, რომ მნიშვნელობა არ აქვს, მარცხენა ფლანგზე ითამაშებს თუ ცენტრალური თავდამსხმელის პოზიციაზე: "კარიერა ცენტრფოვარდად დავიწყე, მაგრამ "მონაკოშიც" კი ხანდახან ვინგერად ვთამაშობდი და მოედანზე ამ როლს შევეგუე. ასე რომ, ამისგან სიამოვნებას ვიღებ. ყველაზე მნიშვნელოვანი მოედანზე ყოფნაა."

წყარო: manutd.com