ზლატან იბრაჰიმოვიჩს მიაჩნია, რომ "მანჩესტერ იუნაიტედს" სამ სხვადასხვა ტურნირზე შეუძლია წარმატების მიღწევა.

"წითელ ეშმაკებს" 11 დღეში სამ თასზე ოთხი მატჩის ჩატარება მოუწევთ, რომელთაგან ორი ევროპა ლიგის ეგიდით, თითო კი ინგლისის თასისა და ლიგის თასის მასშტაბით ჩატარდება.

26 თებერვალს "იუნაიტედი" ლიგის თასის ფინალში "საუთჰემპტონს" დაუპირისპირდება, მანამდე კი "სენტ-ეტიენთან" გამართავს ორ მატჩს, ხოლო "ბლექბერთან" ერთ შეხვედრას.

იბრაჰიმოვიჩი აღიარებს, რომ პრემიერ ლიგის მოგების შანსი მცირეა, მაგრამ შესანიშნავად აცნობიერებს სხვა ტურნირებზე წარმატების მიღწევის მნიშვნელობას.

"უბრალოდ სვლა უნდა გავაგრძელოთ. გვინდა, რომ ევროპა ლიგის მომდევნო ეტაპზე გავიდეთ და "სენტ-ეტიენთან" კარგი საშინაო მატჩი გვაქვს. მიმდინარე სეზონში შესაძლო 5 ტიტულიდან ერთი [ქომუნითი შილდი] უკვე მოვიგეთ და დანარჩენ ოთხ ტურნირზეც ვართ.

ვფიქრობ, ჩვენ წინ მყოფი ოთხი გუნდიდან [იბრაჰიმოვიჩმა ინტერვიუ "უოტფორდთან" მატჩის შემდეგ მისცა, როცა "იუნაიტედი" მეხუთე ადგილზე იმყოფებოდა] მხოლოდ ერთი გახდება ჩემპიონი. დანარჩენებს ტიტულის მოგების შანსი არ აქვთ, მაგრამ ჩვენ უკვე გვაქვს ერთი თასი და მეორეს მოგებაც შეგვიძლია, გარდა ამისა, ევროპა ლიგაზეც ვთამაშობთ და ინგლისის თასზეც, ასე რომ, პრემიერ ლიგის ჩემპიონები თუ ვერ გავხდებით, მინიმუმ ორი ან სამი ტიტულის მოგება შეგვიძლია".

"წითლები" ოქტომბრის შემდეგ პირველად გადავიდნენ მეხუთე ადგილზე, სანამ "ლივერპულმა" "ტოტენჰემი" დაამარცხა და "იუნაიტედმა" კვლავ მეექვსე ადგილზე გადაინაცვლა.

"ვიცით, სადაც ვართ და ისიც ვიცით, რომ აქ რამდენიმე თვის განმავლობაში ვიმყოფებით.

მეხუთე ადგილზე 20 წუთის განმავლობაში ვიყავით და ახლა ჩვენს პოზიციას დავუბრუნდით, მაგრამ ვიცით, რაც უნდა გავაკეთოთ. გამარჯვებების მოპოვება უნდა გავაგრძელოთ ცხრილში მაღლა ასასვლელად და სხვებისგან ქულების დაკარგვის იმედად ვიყოთ."

"უოტფორდთან" გამარჯვების მიუხედავად შვედი იმედგაცრუებული დარჩა იმით, რომ თავისი ერთ-ერთი შანსი ვერ გამოიყენა.

"უფრო მეტის გატანა შეგვეძლო; ნეტავ გამეტანა. ერთი თუ ორი კარგი შანსი მქონდა და უნდა გამომეყენებინა.

ვფიქრობ, ასეთ მატჩებში ბევრ შესაძლებლობას ვერ იღებ და როცა მიიღებ, უნდა გამოიყენო. ამიტომაც ვიყავი იმედგაცრუებული საკუთარი თავით, მაგრამ ამავე დროს თავს კარგად ვგრძნობდი.

ბურთს ხშირად ვიღებდი, გუნდს კი სტაბილურობას ვაძლევდი და ვუქმნიდი. ერთადერთი რამ, რაც დამაკლდა, გოლია, მაგრამ მატასა და მხითარიანს ჩემ ირგვლივ თამაშის საშუალებას ვაძლევდი, რათა ბიჭებს უფრო მეტი თავდაჯერებულობა შეეძინათ."

"სენტ-ეტიენი" "ოლდ ტრაფორდს" ორშაბათს ეწვევა, ექვსი დღის შემდეგ კი "იუნაიტედი" გაემგზავრება საფრანგეთში.

"ორი მატჩი, ორი ფინალია. უმნიშვნელო იქნება, რა შედეგს მივაღწევთ ხუთშაბათს; ორივე მატჩში კარგი შედეგი დაგვჭირდება."

წყარო: manutd.com