ჰენრიხ მხითარიანს მიაჩნია, რომ "მანჩესტერ იუნაიტედის" ნახევარმცველი პუბლიკისგან ჭარბ ზეწოლას განიცდის, რადგანაც მისგან სასწაულს ელიან.

23 წლის პოლ პოგბას შესაძენად "იუნაიტედს" მსოფლიოს სატრანსფერო რეკორდის დამყარება მოუხდა.

ტურინში გატარებული 4 წლის შემდეგ ფრანგი "ოლდ ტრაფორდზე" მსოფლიო კლასის ფეხბურთელის რანგში დაბრუნდა, მაგრამ კლუბთან დაკავშირებული თითოეული ადამიანი მასზე უფრო დიდ იმედს ამყარებს.

პოგბასადმი მოთხოვნა ყოველ მატჩში სულ უფრო იზრდება, მხითარიანს კი მიაჩნია, რომ ეს მხოლოდ ცუდ გავლენას ახდენს მის თანაგუნდელზე, რომელსაც თავისუფლება სჭირდება, რათა დაშვებული შეცდომებიდან ისწავლოს.

"ძალიან დიდი პოტენციალი აქვს. ცოტა უჭირს, რადგან ჯერ მხოლოდ 23 წლისაა და შესაძლოა ფიქრობდეს, რომ უფრო მეტი უნდა შეძლოს, ვიდრე ახერხებს, თუმცა მჯერა, მწვრთნელთან ერთად პრობლემას გადაჭრის და ამას უკვე ცდილობს.

იქნებ ხალხი მისგან რაღაც არაორდინალურს, სასწაულს ელის, მაგრამ ყველასთვის ცხადია, რომ ფეხბურთელი, ადამიანია და ამიტომაც მხოლოდ ისე უნდა ითამაშოს, როგორც შეუძლია და უკეთესიც გახდება," - განაცხადა სომეხმა ფეხბურთელმა.

წყარო: goal.com