"მანჩესტერ იუნაიტედის" ყველა დროის საუკეთესო ბომბარდირად გახდომის შემდეგ უეინ რუნიმ მომდევნო დიდი მიზანი დაისახა - ლიგის თასის ფინალში გასვლა და მოგება.
"წითლებს" 90 წუთი აშორებთ მომდევნო თვეში "უემბლიზე" თამაშამდე და ამისთვის მხოლოდ ის არის საჭირო, რომ "ჰალ სიტისთან" 2-ბურთიანი უპირატესობა ხუთშაბათს შეინარჩუნონ.
რუნიმ "იუნაიტედში" პირველად სწორედ ლიგის თასი მოიგო 2006 წელს - "უიგანთან" ფინალში მან დუბლი შეასრულა, შეხვედრა კი 4-0 დასრულდა - და კაპიტანს კიდევ ერთხელ სურს ამ ტურნირზე გამარჯვება.
"მომდევნო მიზანი ლიგის თასია, მისი მოგება გვინდა. ფინალი თებერვალშია და ხუთშაბათს იქ მოსახვედრად ვითამაშებთ.
ფეხბურთში ყველა ტიტულის მოგება კარგია და სწორედ ამ ტიტულის მოგება შეგვიძლია შემდეგში, რაზეც ყურადღებას ვამახვილებთ, სწორედ ხუთშაბათს. ჯერ კიდევ ვმონაწილეობთ ყველა იმ ტურნირზე, რომელშიც მიმდინარე სეზონში ჩავერთეთ. პრემიერ ლიგის მოგება რთული იქნება, მაგრამ ჩვენ საკმარისად კარგი გუნდი გვყავს იმისათვის, რომ ყველა ტურნირზე ვიბრძოლოთ", - განაცხადა რუნიმ.
რუნიმ სერ ბობი ჩარლტონთან შეხვედრაც მიმოიხილა, რომლის რეკორდიც მან "სტოკ სიტისთან" გატანილი გოლით დაამხო და 31 წლის ფეხბურთელი აღნიშნავს, რომ ჯერ კიდევ ბევრი გოლი აქვს გასატანი.
"დიახ, ვგრძნობ, რომ ჯერ კიდევ ბევრის გატანა შემიძლია. ჯერ მხოლოდ 31 წლის ვარ და ახლა ფეხბურთელები უფრო დიდხანს თამაშობენ. ამისთვის მზად ვარ. თავს კარგად, მხნედ ვგრძნობ, ჯანმრთელად ვარ და თამაშის გაგრძელებას ვაპირებ.
ვაფასებ, რომ მატჩის შემდეგ ჩემთან სერ ბობი მოვიდა, რასაც ყოველი შეხვედრის შემდეგ აკეთებდა. "მანჩესტერ იუნაიტედში" დიდი პიროვნება და ლეგენდაა. მე და სხვა ფეხბურთელები მას დიდ პატივს ვცემთ და გვსიამოვნებს მისი მოსვლა".
როცა ჰკითხეს, შეძლებდა თუ არა ვერა ვინმე, დაემხო მისი რეკორდი, რუნიმ აღნიშნა: "ამას წინასწარ ვერ გამოიცნობ, მაგრამ ამის იმედი მაქვს, რადგან "მანჩესტერ იუნაიტედის" სამომავლო წარმატება მსურს, ვინმე თუ დაამხობს რეკორდს, ნიშნავს, რომ აქ მოსულს კარგი კარიერა ჰქონდა და "მანჩესტერ იუნაიტედისთვის" კარგი გააკეთა. იმედია, ვინმე შეძლებს, მაგრამ ფეხბურთში ამას ვერასდროს მიხვდები".