უეინ რუნის კარიერაში და "მანჩესტერ იუნაიტედის" ისტორიაში ახალი ციფრები ჩაიწერა - 250 გოლით ის კლუბის ყველა დროის საუკეთესო ბომბარდირია. ინგლისის ნაკრებში სერ ბობი ჩარლტონის რეკორდის დამხობის შემდეგ, უეინმა "იუნაიტედის" ბომბარდირთა სიაში პირველი ადგილი დაიკავა.

"სტოკთან" მატჩის შემდეგ, Manutd.com-თან სერ ბობი ჩარლტონმა და სერ ალექს ფერგიუსონმა უეინის მიღწევაზე ისაუბრეს.

სერ ბობი: "40 წელი გავიდა მას შემდეგ, რაც "მანჩესტერ იუნაიტედისთვის" ჩემი 249 გოლიდან ბოლო გავიტანე და უნდა ვაღიარო, რომ შევეჩვიე კიდეც კლუბის საუკეთესო ბომბარდირად ყოფნის სახელს.
"ოლდ ტრაფორდზე" ბევრი წარმოუდგენელი თავდამსხმელი გვყავდა და ისინი ბევრ გოლს იტანდნენ, მაგრამ ჯერ კიდევ დიდი ხნის წინ გახდა ნათელი, რომ რუნის ყველაზე მეტად შეეძლო ამ რეკორდის დამხობა. რომ გითხრათ იმედგაცრუებული არ ვარ მეთქი - მოვიტყუები. მაგრამ ამავდროულად, მოხარული ვარ რუნის მიღწევით. ის იმსახურებს საკუთარი სახელის ისტორიის წიგნებში ჩაწერას.

35 წლის ვიყავი, როცა ფეხბურთის თამაში შევწყვიტე, უეინი კი ჯერ მხოლოდ 31 წლისაა. ასე რომ, არამგონია ის ამ შედეგს დასჯერდეს. უეინი აგრძელებს გოლებში, ასისტებში მონაწილეობას და საკუთარი შესაძლებლობების დამტკიცებას. ის თავის ნიშნულს კიდევ უფრო გაზრდის და არამგონია, ვინმემ მისი მაჩვენებელი დიდი ხნის მანძილზე გაიმეოროს."

სერ ალექსი: "მინდა უეინს ამ ეტაპის მიღწევა მივულოცო. გმირობაა ამდენი გოლის გატანა და იმ რეკორდის დამხობა, რომელიც 40 წლის მანძილზე ხელშეუხებელი იყო. უეინი აუცილებლად იმსახურებს თავისი სახელის ამ დიდი კლუბის ისტორიაში შესვლას და დარწმუნებული ვარ, რომ გოლების გატანას ის გააგრძელებს. ყოჩაღ უეინ, შენით მოხარული ვარ. შენ უკვე დიდი ხანია რაც ამ კლუბის ერთგული მოსამსახურე ხარ და ეს კიდევ დიდხანს უნდა გაგრძელდეს"

წყარო: manutd.com