"მანჩესტერ იუნაიტედის" ვინგერით, ეშლი იანგით "შენდონგ ლიუნენგი" ინტერესდება, რომელიც 31 წლის ფეხბურთელს 16 მლნ. ფუნტს გადაუხდის ხელფასის სახით.

ინგლისელი მზად არის, პრემიერ ლიგა დატოვოს და ჩინეთში ფულის გამომუშავებისთვის გადავიდეს.

იანგის შეძენის მსურველთა შორის "ვესტ ბრომიც" მოიაზრება, რომელიც ეშლის რეგულარულ სათამაშო პრაქტიკას ჰპირდება.

მაგრამ MirrorSport-ი ირწმუნება, რომ ჩინური კლუბი იანგს გაცილებით მომგებიან ხელფასს სთავაზობს და შეთანხმება შედგება, თუკი "იუნაიტედი" თავისი ფეხბურთელის სანაცვლოდ 10 მლნ. ფუნტს მიიღებს.

იანგი "ოლდ ტრაფორდზე" მოქმედი კონტრაქტის თანახმად 2018 წლამდე დარჩება და კვირაში 120 ათას ფუნტს იღებს ხელფასის სახით, სურვილის შემთხვევაში კი "იუნაიტედს" მასთან შეთანხმების ვადის ერთი წლით გახანგრძლივების უფლებაც აქვს.

ჟოზე მოურინიო ეშლის იშვიათად აძლევს თამაშის საშუალებას, მან მხოლოდ 6 მატჩი ჩაატარა სასტარტო შემადგენლობაში და ძირითადად მარჯვენა მცველად გვევლინებოდა.

ამით უკმაყოფილო ფეხბურთელი შორეულ აღმოსავლეთში გადასვლის სურვილს გამოთქვამს, სადაც გრაციანო პელესთან ერთად თამაშის საშუალება ფელიქს მაგატის ხელმძღანელობით მიეცემა.

ჩინური სატრანსფერო ფანჯარა 26 თებერვალს იხურება, ახალი სეზონი კი 4 მარტს დაიწყება.

წყარო: mirror