ლონდონის "ჩელსის" მეკარე ტიბო კურტუა აცხადებს, რომ ბავშვობაში ედვინ ვან დერ სარის სტილის შესწავლას ცდილობდა და ამისთვის იგი სხვადასხვა საშუალებებს იყენებდა.

ჰოლანდიელსა და ბელგიელს არასდროს ჩაუტარებიათ მატჩი ერთმანეთის წინააღმდეგ, თუმცა "მფრინავი ჰოლანდიელის" ასპარეზობის შესახებ ყველასთვის კარგად არის ცნობილი.

ვან დერ სარმა თავისი პროფესიონალური კარიერა "აიაქსში" დაიწყო, სადაც 9 წელი გაატარა და ჩატარებულ 226 მატჩში ერთი გოლის გატანაც მოახერხა. მისი მომდევნო კლუბი ტურინის "იუვენტუსი" იყო, რომლის დატოვების შემდეგაც ინგლისს მიაშურა, თუმცა "მანჩესტერ იუნაიტედამდე", სადაც 2005 წლიდან 2011 წლამდე 6 სეზონი გაატარა, "ფულჰემის" რიგებში ირიცხებოდა.

ვან დერ სარს თავის კარიერაში 25 ტიტული აქვს მოგებული და ვიტორ ბაიას შემდეგ ყველაზე ტიტულოვანი მეკარეა. მის სახელს ეკუთვნის მსოფლიოს ყველაზე ხანგრძლივი "მშრალი" სერია, რომელიც 2008/09 წლების სეზონში აჩვენა - 1311 წუთის განმავლობაში მას გოლი არ ჰქონდა გაშვებული. ჰოლანდიის ნაკრებში ედვინს 130 მატჩი აქვს ჩატარებული, რაც რეკორდული შედეგია. ასევე, ვან დერ სარი ყველაზე ასაკოვანი ფეხბურთელი გახდა, რომელმაც პრემიერ ლიგა მოიგო - 40 წელი და 205 დღე. ბუნებრივია, გუნდური ჯილდოების გარდა ჰოლანდიელს ინდივიდუალური მიღწევებიც აქვს - საუკეთესო ევროპელი მეკარე 1995 და 2009 წლებში, UEFA-ს წლის საუკეთესო საკლუბო მეკარე 2009 წელს.

"ყველაზე მეტად ვისაც ვბაძავ, ედვინ ვან დერ სარია. როცა მეკარეობა გადავწყვიტე, მისი სტილის შესწავლა დავიწყე, რაც ნამდვილად გჭირდება, როგორც მეკარეს, ამისათვის კი სატელევიზიო კადრებს და youtube-ზე მოპოვებულ ვიდეოებსაც ვიყენებდი," - განაცხადა კურტუამ.

წყარო: premierleague.com