"მანჩესტერ იუნაიტედის" მთავარი მწვრთნელი, ჟოზე მოურინიო აცხადებს, რომ მარუან ფელაინის თავისი მხარდაჭერა კიდევ ერთხელ გამოუხატა, როცა ინგლისის ლიგის თასის მატჩში შეცვლაზე შესვლისას მას მნიშვნელოვანი როლი დააკისრა.
ბელგიელმა ფეხბურთელმა ხანგრძლივი უგოლო სერია დაასრულა და "ჰალ სიტის" კარში "იუნაიტედის" მეორე გოლი გაიტანა, რითაც "წითლებს" საპასუხო მატჩის წინ მნიშვნელოვანი უპირატესობა მოუპოვა.
გოლის გატანის შემდეგ ფელაინი მწვრთნელისკენ გაიქცა და ემოციურად აღნიშნა, რის მიზეზადაც მოურინიოს ნახევარმცველისადმი მისი დამოკიდებულა მიაჩნია.
"ვფიქრობ, უნდა ეჩვენებინა, რომ იცის, როგორ ვუჭერდი მხარს მისთვის რთულ მომენტებში. შეიძლება, იმიტომ მოიქცა ასე, რომ ვუთხარი, მეორე გოლი შენ უნდა გაიტანო-მეთქი. არ ვიცი. მისთვის კარგია, რომ გულშემატკივართა წინაშე გაიტანა და მეორე გოლი მნიშვნელოვანიც იყო", - განაცხადა მწვრთნელმა.