"მანჩესტერ იუნაიტედის" ყოფილმა მცველმა იაპ სტამმა ინგლისის თასის მატჩის შემდგომ განაცხადა, რომ "იუნაიტედის" გულშემატკივრების დახვედრით კმაყოფილია და ძალიან უყვარს "ოლდ ტრაფორდზე" დაბრუნება.

როგორც მოსალოდნელი იყო, ჰოლანდიელი თბილად მიიღო "ოლდ ტრაფორდმა" და იგი აპლოდისმენტებით გააცილეს, როცა ინგლისის თასის მესამე რაუნდის მატჩის დასრულების შემდეგ გასახდელისკენ მიემართებოდა.

სტამი "რედინგს" საკმაოდ წარმატებით წვრთნის და მისი გუნდი ჩემპიონშიპში მესამე ადგილზე იმყოფება, საიდანაც პრემიერ ლიგაში მოსახვედრად იბრძვის.

მიუხედავად იმისა, რომ სტამმა მხოლოდ სამი სეზონი გაატარა "იუნაიტედში", მან გულშემატკივართა შორის სიყვარული დაიმსახურა.

"მიყვარს ეს გულშემატკივრები. რა თქმა უნდა, მატჩის მიმდინარეობისას ყოველ წამს მათ ხელს ვერ დავუქნევდი, როცა ჩემზე მღეროდნენ, რადგან თამაშისთვის, ჩემი ფეხბურთელებისთვის უნდა მედევნებინა თვალი და მოედნის კიდედან მათი დახმარება მეცადა კონტაქტის დამყარებით, მაგრამ ასე თუ იმღერებენ, რთულია დამყარება, ამიტომ ხანდახან ხმას უნდა დაუწიონ, მაგრამ, რა თქმა უნდა, ძალიან ბედნიერი ვარ იმით, რაც დღეს გააკეთეს ჩემთვის. აქ დიდებული პერიოდი გავატარე, მომწონდა ჩემი ყოფნა "იუნაიტედში" და მიყვარს ეს გულშემატკივრები, ამიტომაც დიდებულია აქ დაბრუნება", - განაცხადა ჰოლანდიელმა.

წყარო: manutd.com