"მანჩესტერ იუნაიტედის" კაპიტანმა უეინ რუნიმ სიხარული არ დამალა მიღწევით, რომელმაც ბობი ჩარლტონთან ერთად კლუბის ყველა დროის საუკეთესო ბომბარდირის წოდება მოუტანა და იმედი გამოთქვა, რომ მომდევნო გოლს არ დააყოვნებს.

31 წლის ფეხბურთელმა "იუნაიტედის" კარიერაში გატანილი 249-ე გოლით "რედინგთან" მატჩში ანგარიში გახსნა და სერ ბობი ჩარლტონთან ერთად "წითლების" ყველა დროის საუკეთესო ბომბარდირი გახდა.

"საამაყო მომენტია. ჩემთვის დიდი პატივია ამის მიღწევა "მანჩესტერ იუნაიტედის" მსგავს დიდ კლუბში და ამ მომენტით ვამაყობ. ასეთ რამეს ვერ წარმოვიდგენდი, თუმცა კლუბში დიდი ხანია ვარ და ჩემი ცხოვრების უდიდესი ნაწილია. ვამაყობ, რომ ბობი ჩარლტონის გვერდით ვარ სიაში.

რეკორდების დამყარება თუ გინდა, საკუთარი გულშემატკივრების წინაშე უნდა გააკეთო და წინ ორი საშინაო მატჩი გვაქვს. იმედია, ერთ-ერთ მათგანში მომდევნო გოლს გავიტან", - განაცხადა ინგლისელმა.

"იუნაიტედის" მთავარმა მწვრთნელმაც გამოთქვა იმედი, რომ მისი გუნდის კაპიტანი ახალ რეკორდს მალე დაამყარებს.

"უფრო განსაკუთრებული დღეც იქნება. ეს დიდებულია, მაგრამ კიდევ ერთი გოლი მინდა! კოლექტივში საოცარი ადამიანია და ყველას გვსურს, რომ ეს შეძლოს. კლუბში იყო მისი საუკეთესო ბომბარდირის სტატუსით - მისთვის დიდებულია", - დაამატა მოურინიომ.