"მანჩესტერ იუნაიტედის" მთავარმა მწვრთნელმა ჟოზე მოურინიომ განაცხადა, რომ მის ხელთ არსებული ფეხბურთელების რაოდენობა სრულიად აკმაყოფილებს, თუმცა ყველა მოთამაშეს ერთნაირად კარგი დონის ფეხბურთელად არ მიიჩნევს.

"წითლები" პრემიერ ლიგის ცხრილში ამჟამად მეექვსე ადგილს იკავებენ და ჩემპიონთა ლიგის ზონაში მოსახვედრად იბრძვიან. გარდა ამისა, გუნდი ასპარეზობს სამ სხვადასხვა ტურნირზე, რომელთაგან ერთ-ერთის მატჩს დღეს "რედინგის" წინააღმდეგ გამართავს.

მოურინიოს გუნდი ევროპა ლიგის მეთექვსმეტედფინალისტიცაა და ინგლისის ლიგის თასის ნახევარფინალში "ჰალ სიტის" ორმატჩიან დუელში უპირისპირდება.

"24 ფეხბურთელი მყავს. 25 ან 30 ვერ მეყოლება. ფეხბურთელთა საჭირო რაოდენობა გვყავს. არის თუ არა ყველა ფეხბურთელი ერთნაირი? არა, რეალისტები ვიყოთ. კარგი გუნდია, მაგრამ ყველა ფეხბურთელი ერთნაირი არ არის.

ერთია ანტონიო ვალენსიას დაყენება მარჯვენა მცველად და სულ სხვაა სხვა ვინმეს გამოყვანა. ერთია პოლ პოგბას თამაში და სულ სხვაა მისი არყოფნა. სიტუაციაზეა დამოკიდებული.

რა ვიცი, ის არის, რომ არსებობენ ევროტურნირების გარეშე დარჩენილი გუნდები, ჩვენ კი ყველაზე ცუდ ევროტურნირზე ვართ, რადგან ბოლომდე თუ გახვალ, მატჩები და მატჩები გაქვს დაუსრულებლად.

ორმატჩიანი დუელი გვაქვს "ჰალთან" ნახევარფინალში. ფინალში თუ გავალთ, "ჰალს" თუ დავამარხებთ, "მანჩესტერ სიტის" მოგვიანებით ვეთამაშებით, რადგან ეს მატჩი ფინალის დღესაა დანიშნული.

ამიტომ იმედი მაქვს, რომ ძალიან რთული სიტუაცია არ გვექნება, თუმცა გვექნება", - განაცხადა მოურინიომ.

წყარო: skysports