სლავენ ბილიჩმა ფილ ჯონსისა და სოფიან ფეგულის ეპიზოდი, რომლის შემდეგაც "ვესტ ჰემის" ფეხბურთელი გააძევეს, თავისი შეგირდის სასარგებლოდ შეაფასა და განაცხადა, რომ ფეგული მოედნის დატოვებას არ იმსახურებდა.

სოფიანი პირველად მოხვდა "ჩაქუჩების" სასტარტო შემადგენლობაში პრემიერ ლიგის მატჩში, მაგრამ მან მოედანზე მხოლოდ 15 წუთი გაატარა, რის შემდეგაც იგი წითელი ბარათის გამო მოედნიდან გააძევეს.

"ვესტ ჰემი" კაცნაკლული იცავდა თავს "იუნაიტედის" წინააღმდეგ, მაგრამ ხუან მატასა და ზლატან იბრაჰიმოვიჩის გოლებით დამარცხდა.

ლონდონელთა მთავარი მწვრთნელი მიიჩნევს, რომ მსაჯის გადაწყვეტილებებმა უმთავრესი გავლენა მოახდინა შეხვედრაზე და ჯარიმა არათუ "იუნაიტედის", არამედ "ვესტ ჰემის" სასარგებლოდ უნდა დანიშნულიყო.



"წითელი ბარათი არ იყო. ორივე მათგანი შევიდა ორთაბრძოლაში. წესებს კი ფილ ჯონსი არღვევდა. ბურთზე დაასწრო, მაგრამ "მაკრატლით" წავიდა.

სოფიან ფეგულის ფეხი ჰაერში არ ჰქონდა აწეული და არც განზრახული ქმედება იყო. გადამწყვეტი ფაქტორი გახდა და ამან მოგვკლა. თამაში სრულიად სხვა პერსპექტივით განვითარდა და სავსებით უსამართლოდ.

ფილმა თავი მოაჩვენა, მაგრამ ვერ დაადანაშაულებ. იქნებ იმიტომ მოიქცა ასე, რომ ისიც სახიფათოდ წავიდა და თავი დაიძვრინა", - განაცხადა ბილიჩმა.

"ვესტ ჰემი" კიდევ უფრო დაიჩაგრა, როცა შეხვედრაში ანგარიშის გახსნიდან რამდენიმე წუთში იბრაჰიმოვიჩმა თამაშგარე მდგომარეობიდან გაიტანა.

"მეორე გოლის დროს დიდი თამაშგარე იყო. როცა ფეხბურთელები დარბიან, მსაჯს დაფიქსირება უჭირს. მე პირველი ვიტყვი ამას. მაგრამ ამ შემთხვევაში ისინი დადიოდნენ. უნდა დაეფიქსირებინათ."

წყარო: goal.com