"მანჩესტერ იუნაიტედის" მარჯვენა მცველმა მატეო დარმიანმა განაცხადა, რომ კლუბში თავს ბედნიერად გრძნობს და მის დატოვებას არ აპირებს.

"წითელი ეშმაკების" მთავარი მწვრთნელის პოსტზე ჩატარებულ პირველ 14 მატჩში ჟოზე მოურინიომ მხოლოდ ორჯერ ათამაშა დარმიანი და ორივე მათგანი ევროპა ლიგის მატჩებზე მოდის, რის შემდეგაც გავრცელდა ჭორები იმის შესახებ, რომ მატეო კლუბის დატოვებას აპირებდა.

ბოლო პერიოდში კი მოურინიო დარმიანს რეგულარულად ათამაშებს, მაგრამ არა მისთვის ჩვეულ მარჯვენა ფლანგზე, არამედ მარცხენა მცველის პოზიციაზე.

შექმნილი ვითარებიდან გამომდინარე 27 წლის მცველს აქტიურად უკავშირებდნენ "იუვენტუსს", "ინტერს" და "ჩელსის", რომელსაც ანტონიო კონტე, დარმიანის თანამემამულე და ნაკრებში მისი ყოფილი მწვრთნელი წვრთნის.

თუმცა, თავად ფეხბურთელი აცხადებს, რომ "იუნაიტედთან" განშორებას არ აპირებს.

"მსოფლიოს ერთ-ერთ უდიდეს კლუბში ვთამაშობ, ამიტომ ბედნიერი ვარ. შესაძლო ტრანსფერზე ბევრს ვკითხულობ და ვისმენ, მაგრამ პირადად მე არაფერი ვიცი. ამჟამად ეს ყველაფერი სიცრუეა", - განაცხადა იტალიელმა.

წყარო: espn