ინგლისის ერთ-ერთი ყველაზე პრესტიჟული გამოცემა SkySports_ი აქვეყნებს სტატიას, რომელშიც ნათქვამია, რომ „მანჩესტერ იუნაიტედის“ სამიზნეები ზამთრის სატრანსფერო ფანჯარაზე, დიეგო გოდინი და გონსალო გედესი იქნებიან.
მას შემდეგ რაც „იუნაიტედმა“ „ევერტონთან“ მატჩი ფრედ, 1-1 დაასრულა, გადაწყდა რომ გუნდს ახალი ტოპ-კლასის ცენტრალური მცველი სჭირდება. სწორედ ამიტომ „ატლეტიკო მადრიდის“ ცენტრალური მცველი დიეგო გოდინი შესაძლოა ზამთარში „იუნაიტედს“ შეუერთდეს. ურუგვაელი მცველი „ატლეტიკოში“ 2010 წლიდან დღემდე ირიცხება და ჯამში „მადრიდელთა“ მაისურით 120-ზე მეტი მატჩი ჩაატარა. დიეგომ ამ სეზონში მოედანზე 1440 წუთი გაატარა და ჯამში 105 ორთაბრძოლა მოიგო. „მანჩესტერელმა“ კრის სმოლინგმა კი მოედანზე 770 წუთი ითამაშა და 45 დუელი მოიგო. ამ სეზონში დიეგო გოდინმა ასევე მოახერხა ორი გოლის გატანა „ატლეტიკო მადრიდის“ მაისურით.
რაც შეეხება პორტუგალიელ გონსალო გედესს, იგი ირიცხება პორტუგალიური „ბენფიკას“ რიგებში. თავის გუნდში მას „ახალ რონალდოს“ უწოდებენ. 20 წლის პერსპექტიული ვინგერით სწორედ „იუნაიტედია“ დაინტერესებული. ახალგაზრდა მოთამაშემ ამ სეზონში ოთხი გოლის გატანა შეძლო, მისი პასების 84.5% ზუსტად მთავრდება. მას შემდეგ რაც რენატო სანჩეზმა „ბენფიკა“ დატოვა და მიუხენის „ბაიერნს“ შეუერთდა, გედესი მის ღირსეულ შემცველად ითვლება.