ოფიციალურად - უეინ რუნი "მანჩესტერ იუნაიტედის" საუკეთესო ბომბარდირია ევროპულ მატჩებში.

"ფეიენოორდთან" მატჩის პირველ ტაიმში გატანილი გოლით გუნდის კაპიტანმა რუდ ვან ნისტელროის 38-გოლიან მაჩვენებელს აჯობა და კლუბის ისტორიაში კიდევ ერთი მიღწევით შევიდა.

რა თქმა უნდა, მომდევნო პირადი მიღწევა, რომელიც ასევე რუნის სახელს დაუკავშირდება, "იუნაიტედის" ყველა დროის საუკეთესო ბომბარდირობა იქნება. "ფეიენოორდის" კარში გატანილი მისი გოლი ევროპის მასშტაბით 39-ე, ხოლო საერთო ჯამში "იუნაიტედის" მაისურით გატანილი 248-ე გოლი იყო, რაც იმას ნიშნავს, რომ სერ ბობი ჩარლტონის შედეგამდე მას მხოლოდ 1 გოლიღა აშორებს.



მატჩის შემდეგ რუნიმ განაცხადა: "დიდებული შეგრძნებაა გოლების გატანა და განსაკუთრებით "იუნაიტედის" რიგებში გატანა. მოხარული და დარწმუნებული ვარ, რომ წინ კიდევ ბევრი გველის. პირველ რიგში გამარჯვებით ვარ ბედნიერი, მაგრამ გოლითაც ასევე.

გვიხარია, რომ ოთხი გოლი გავიტანეთ. ვფიქრობ, მეორე გოლმა თამაში მოკლა. მიუხედავად იმისა, რომ 1-0 ვიგებდით და თამაშს ვაკონტროლებდით, არასოდეს იცი, რა მოხდება, ასე რომ, მეორე გოლმა ისინი თამაშს გამოთიშა. საერთო ჯამში კარგად ვითამაშეთ".