"მანჩესტერ იუნაიტედის" თავდამსხმელ ზლატან იბრაჰიმოვიჩს სჯერა, რომ "წითლებს" ნათელი მომავალი აქვთ.

35 წლის ფორვარდმა "სუონსისთან" მატჩში დუბლი შეასრულა, რითაც "იუნაიტედის" რიგებში რვა გატანილი გოლი დააგროვა. მისი გოლები ამავდროულად პრემიერ ლიგის 25 000-ე და პირადი საკლუბო კარიერის მე-400 გოლიც გამოდგა.

შვედს აქამდე უკანასკნელად სექტემბერში ჰქონდა გოლი გატანილი და ხანგრძლივი უგოლო სერია დუბლით შეწყვიტა.

"იცით რა? პროფესიონალურ ფეხბურთში გატარებული 15 წლის შემდეგ ბევრი გოლი გამიტანია და კიდევ გავიტან. ვიცი ეს როგორც მუშაობს. რაც უფრო მეტ შანსს ქმნი, მით მეტად ახლოს ხარ გოლის გატანის ზონასთან, ამიტომ ამაზე არ ვღელავდი.

ყველაზე მნიშვნელოვანი გუნდის გამარჯვება, თავდაჯერებულობა და კოლექტიური მუშაობაა, შემდეგ კი ინდივიდუალიზმი, რადგან ბოლოს ყოველთვის ეს იჩენს თავს.

გოლის გატანა მინდა, ეს საიდუმლო არ არის, გატანა იმიტომ მინდა, რომ ასე ვეხმარები. ჩემი თანაგუნდელებისთვის შანსის შექმნა მინდა, მათთვის გოლის გატანაში დახმარება მინდა. ასე რომ, რაც უფრო ხშირად ვაკეთებ ამას, არ ვღელავ. დიახ, რამდენიმე ისეთი მატჩი იყო, რომელშიც გოლი ვერ გავიტანე, მაგრამ შანსები შეიქმნება. ოდნავ არ მიმართლებდა ბოლო თამაშებში, მაგრამ საქმე მხოლოდ შრომაშია და ესეც მოვა", - განაცხადა შვედმა.

400-გოლიანი ნიშნულის მიღწევა თავდამსხმელისთვის დიდი საამაყო მიზეზი უნდა იყოს, მაგრამ შვედი ამ მიღწევით ეიფორიაში არ არის.

"კარგი შედეგია, მაგრამ ახლა ამაზე ნამდვილად არ ვფიქრობ. მხოლოდ ყურადღების მოკრებას და რაც შეიძლება მეტი გოლის გატანას ვცდილობ. სანამ ვთამაშობ, შრომას არ შევწყვეტ. მე იმდენი გოლი მაქვს გატანილი, რომ ზოგიერთ ფეხბურთელს ამდენი თამაშიც კი არ აქვს ჩატარებული, ასე რომ, ბედნიერი ვარ."

"წითლები" ახლა "არსენალთან" დასაპირისპირებლად ემზადებიან "ოლდ ტრაფორდზე", მაგრამ ეს მატჩი საერთაშორისო შესვენების შემდეგ ჩატარდება, თუმცა იბრაჰიმოვიჩი შეხვედრას დისკვალიფიკაციის გამო გამოტოვებს.

"იუნაიტედმა" "სუონსისთან" გამარჯვებით მეექვსე ადგილზე გადაინაცვლა და "მეთოფეებს" ექვსი ქულით ჩამორჩება, რომლებიც თავის მხრივ მეოთხე ადგილს იკავებენ. იბრაჰიმოვიჩს კი სჯერა, რომ სანაკრებო მატჩებში ტრავმების თავიდან არიდების შემთხვევაში გუნდს მოგებათა სერიის ჩვენება შეუძლია.

"იმედი მაქვს, სანაკრებო მატჩებიდან ყველა ტრავმის გარეშე დაბრუნდება. შვედეთის ნაკრებში ყოფნიდან ვიცი, რა ხდება იქ.

ახლა მე დავისვენებ და იმედია, ყველა 100%-ით ფოკუსირებული ჩამოვა. თუკი ზედიზედ ორ, სამ, ოთხ თამაშს მოვიგებთ, თავდაჯერებულობა თავისთავად გაჩნდება. რამდენიმე უიღბლო მატჩი ჩავატარეთ, რომლეშიც უნდა მოგვეგო და რამდენიმე ისეთიც, რომლებიც ცუდად წავაგეთ, მაგრამ ბევრს ვვარჯიშობთ და მიზნები იგივე გვაქვს".



წყარო: manutd.com