რაიან გიგზმა განაცხადა, რომ მისი სამწვრთნელო ამბიციების მწვერვალი "მანჩესტერ იუნაიტედის" ან უელსის ნაკრების გაწვრთნა იქნებოდა, მაგრამ მზად არის, დამოუკიდებელი სამუშაო დაბალი დივიზიონიდანაც დაიწყოს.

გასულ კვირას გიგზმა უარი განაცხადა "სუონსიში" მუშაობაზე, რის შემდეგაც საჯაროდ თქვა, რომ უელსური კლუბის ამბიციები მას არ აკმყოფილებდა.

BBC Wales-თან ინტერვიუში "იუნაიტედისა" და უელსური ფეხბურთის ლეგენდამ მოგვითხრო, თუ რომელი კლუბები შეესაბამებიან მის კრიტერიუმებს.

"საკუთარი ქვეყნის ნაკრების ან იმ კლუბის გაწვრთნა, რომელშიც თამაშობდი - მწვრთნელის დიდი მიზანია. ჩემთვის ასეთი კლუბი "მანჩესტერ იუნაიტედია". მოხდება ეს თუ არა, არ ვიცი, მაგრამ ყოველთვის მზად ვიქნები ამისთვის.

როგორც ფეხბურთელი, გამარჯვებული ვიყავი და ასეთივე მწვრთნელი უნდა ვიყო. პრემიერ ლიგაში იქნება ეს თუ ჩემპიონშიპში - ჩემთვის სულერთია", - განაცხადა გიგზმა.