"მანჩესტერ იუნაიტედის" 22 წლის ნახევარმცველი ნიკი პაუელი "უიგანში" თავისუფალი აგენტის სტატუსით გადავიდა.

პაუელმა სამედიცინო შემოწმება სამშაბათს გაიარა, რის შემდეგ უიგანურ კლუბთან 3 წლიანი კონტრაქტი გააფორმა. მოგეხსენებათ, ახალგაზრდა ინგლისელი "ათლეტიკში" 2013/14 წლების სეზონში იყო განათხოვრებული და 13 გოლის გატანა მოახერხა.

ტრანსფერთან დაკავშირებით კომენტარი კლუბის მთავარმა მწვრთნელმა, გარი ქოლდუოელმა გააკეთა:

"ნიკი ხარისხიანი ფეხბურთელია. ის არის ერთ-ერთი მოთამაშე, ვისი შეძენაც ამ ზაფხულს გვინდოდა და მოხარულნი ვართ, რომ ეს შევძელით. როდესაც ის იჯარით "უიგანში" თამაშობდა, იყო საუკეთესო 19 წლის ფეხბურთელი, ვისთანაც ოდესმე მითამაშია.

პერიოდული ტრავმების გამო ის ძალიან ცუდად იყო, თუმცა ნიკის ყოველთვის გვჯეროდა. ის განსაკურებული მოთამაშეა დიდი ტალანტით, რომელსაც სტადიონის ფეხზე დაყენება შეუძლია."

"მანჩესტერ იუნაიტედმა" 2012 წელს პაუელი "ქრიუ ალექსანდრიასგან" 6 მილიონი ფუნტის სანაცვლოდ შეიძინა, მაგრამ ამ დრომდე კლუბს იჯარით პერიოდულად ტოვებდა.

წყარო: Sky Sports