"მანჩესტერ იუნაიტედის" ახალგაზრდა შემტევმა, ეშლი ფლეტჩერმა, გუნდი დატოვა და "ვესტ ჰემთან" 4-წლიანი კონტრაქტი გააფორმა.

20 წლის ინგლისელმა, გასული სეზონი იჯარის წესით, ლიგა ერთში მოასპარეზე "ბარნსლიში" გაატარა და თავი საკმაოდ კარგადაც წარმოაჩინა, 24 შეხვედრაში 7 გოლის გატანა მოახერხა და გუნდის ჩემპიონშიპში აღზევებაში დიდი წვლილი შეიტანა, რამეთუ პლეიოფის სტადიაზე "მილუოლს" გოლი გაუტანა.

"ჩაქუჩების" რიგებში გადასვლის შემდეგ, მან პირველი კომენტარიც გააკეთა:

"ძალიან მოხარული ვარ, რადგან "ვესტ ჰემში" გავაგრძელებ კარიერას.

ვფიქრობ ეს არის კლუბი დიდი ამბიციებით, აქ ძალიან ბევრი კარგი მოთამაშეა და სწორედ ამის გამო შეძლეს გასულ სეზონში კარგი შედეგის ჩვენება."

"იუნაიტედის" ოფიციალურმა საიტმა უკვე დაადასტურა ეშლის ტრანსფერი და მომავალში მას წარმატებები უსურვა.