"მანჩესტერ იუნაიტედის" მთავარი მწვრთნელი ჟოზე მოურინიო დარწმუნებულია, რომ ზაფხულში ხმაურიან ტრანსფერს განახორციელებს, რომელიც "ოლდ ტრაფორდზე" ახალი ეპოქის დაწყების სიმბოლური გამოხატულება იქნება.

შეგახსენებთ, რომ ივნისში "წითლებმა" უკვე შეიძინეს ერთი ფეხბურთელი. "ოლდ ტრაფორდის" მკვიდრთა ახალი მთავარი მწვრთნელის პირველი შენაძენი "ვილიარეალის" ყოფილი ფეხბურთელი ერიკ ბაიი გახდა, რომელშიც კლუბმა 30 მლნ. ფუნტი გადაიხადა.

M.E.N. Sport-ს თავისმა წყარომ აცნობა, რომ მოურინიო მომდევნო სეზონში აპირებს გუნდის ჩამოყალიბებას, რომელიც ტიტულისთვის იბრძოლებს.

პორტუგალიელის პრიორიტეტული სამიზნე პოლ პოგბა გახლავთ, თუმცა მოურინიო მისი გადაბირების შანსებისადმი პესიმისტურად არის განწყობილი, რადგანაც მიაჩნია, რომ ფრანგისთვის ბრძოლას რეკორდული შეთავაზებაც კი ვერ მოაგებინებს.

მომდევნო სამიზნე ზლატან იბრაჰიმოვიჩია, რომელმაც შვედეთის ნაკრებთან ერთად ევროპის ჩემპიონატი დატოვა. მესამე ფეხბურთელი კი, რომელიც მოურინიოს სურს, დორტმუნდის "ბორუსიას" შემტევი ჰენრიხ მხითარიანია.

2013 წელს სერ ალექს ფერგიუსონის პენსიაში გასვლის შემდეგ "იუნაიტედმა" ორჯერ დაამყარა სატრანსფერო რეკორდი ფეხბურთელში გადახდილი თანხის რაოდენობით. პირველად, როცა ხუან მატა შეიძინა "ჩელსიდან" და მეორედ, როცა ანხელ დი მარია გახდა "წითელი ეშმაკი".

2009 წელს კრიშტიანუ რონალდუს გაყიდვის შემდეგ სერ ალექს ფერგიუსონი ძირითადად ახალგაზრდა ფეხბურთელებს იძენდა, რომელთაც სამომავლო პოტენციალი უნდა გამოევლინათ, მაგრამ 2012 წელი გამონაკლისი გახდა, როცა რობინ ვან პერსი "ოლდ ტრაფორდის" ახალწვეულად, მოგვიანებით კი "იუნაიტედის" მე-20 ჩემპიონობის მოპოვების ერთ-ერთ მთავარ წინაპირობად იქცა.

წყარო: M.E.N.