Sky Sports-ი იტყობინება, რომ რაიან გიგზს ძალიან სურს დამოუკიდებელი სამწვრთნელო კარიერის დაწყება, რის გამოც "მანჩესტერ იუნაიტედს" დატოვებს.

ჟოზე მოურინიო უელსელს თავის სამწვრთნელო შტაბში ადგილს სთავაზობდა, თუმცა არა - ასისტენტად, რადგანაც ამ ადგილს მისთვის უკვე კარგად ნაცნობ რუი ფარიას ანდობს.

თუმცა, გიგზი არ აპირებს ასეთი შეთავაზების მიღებას და კლუბთან 29-წლიან კავშირს შეწყვეტს, რადგანაც მან "ოლდ ტრაფორდზე" მოსალოდნელი როლი, ესე იგი, მწვრთნელის პოსტი ვერ მიიღო.

ლუი ვან გაალის წასვლის შემდეგ რაიანს იმედი ჰქონდა, რომ "წითელი ეშმაკების" გაწვრთნის შანსს სწორედ ის მიიღებდა, მაგრამ მოლოდინი არ გაუმართლდა, ვინაიდან "იუნაიტედის" ხელმძღვანელობამ გამოცდილი ჟოზე მოურინიო აირჩია და გიგზს მხოლოდ 21-წლამდელთა გუნდის გაწვრთნა შესთავაზა.

პრესაში იწერებოდა, რომ გიგზი არდადეგებიდან დაბრუნდა და მოურინიოსთან შეხვედრაც კი გამართა, მაგრამ Sky Sports-ი ამ ინფორმაციას უარყოფს და ამტკიცებს, რომ რაიანი კვლავ დუბაიში იმყოფება, პორტუგალიელთან სიტუაციის გასარკვევად კი არ უსაუბრია.

მოურინიო "ოლდ ტრაფორდზე" სილვინიო ლოუროს მიიყვანს მეკარეთა მწვრთნელად. კარლოს ლალინი, რომელიც მოურინიოსთან ერთად მადრიდის "რეალში" და "ჩელსიში" მეორედ მისვლის დროს მუშაობდა, ორშაბათს კარინგტონზე თან ახლდა პორტუგალიელს, როგორც მოსალოდნელია, ისიც იქნება "იუნაიტედის" სამწვრთნელო შტაბში.

წყარო: skysports