"ვესტ ჰემმა" "მანჩესტერ იუნაიტედს" თავისი Facebook გვერდის საშუალებით სთხოვა, რომ დღეს "კრისტალ პალასი" დაამარცხოს.

თბილისის დროით 20:30 წუთზე ინგლისის თასის ფინალური მატჩი გაიმართება, სადაც "არწივები" და "წითელი ეშმაკები" "უემბლიზე" ერთმანეთს დაუპირისპირდებიან.

ეს მატჩი პარდიუსა და ვან გაალის გუნდების გარდა სლავენ ბილიჩის შეგირდებისთვისაც დიდ მნიშვნელობას ატარებს, რადგანაც მასზეა დამოკიდებული, ითამაშებს თუ არა "ვესტ ჰემი" მომდევნო სეზონში ევროპის ლიგაზე.

პრემიერ ლიგის რეგლამენტიდან გამომდინარე, ევროპის ლიგის საგზურებს იძლევა მე-5, მე-6 და მე-7 ადგილები იმ შემთხვევაში, თუ ინგლისის თასისა და ევროპის ლიგის თასის გამარჯვებულები უკვე მოხვედრილნი არიან ევროტურნირზე პრემიერ ლიგის სატურნირო ცხრილში დაკავებული ადგილის მიხედვით.

ლიგის თასი "მანჩესტერ სიტიმ" მოიგო, მაგრამ "ქალაქელები" პრემიერ ლიგაში მეოთხე ადგილზე გავიდნენ და ჩემპიონთა ლიგაზე ითამაშებენ, ხოლო "იუნაიტედი" მე-5 ადგილზე გავიდა და ევროპის ლიგის საგზური მოიპოვა.

გამომდინარე აქიდან, მე-7 ადგილით ევროპის ლიგაზე მოხვედრა გარანტირებული არ არის, რადგან მე-15 ადგილოსანი "კრისტალ პალასი" ჯერ კიდევ ინარჩუნებს ევროტურნირზე მოხვედრის შანსს. იმ შემთხვევაში, თუ "არწივები" "იუნაიტედს" დაამარცხებენ, სწორედ ისინი გავლენ ევროპის ლიგაზე და "ვესტ ჰემი" ვერა.

ამიტომაც "ჩაქუჩების" ხელმძღვანელობამ "იუნაიტედს" სთხოვა, რომ მოვლენათა ასეთი განვითარება თავიდან აარიდოს და დღევანდელ მატჩში სწორედ "წითლებმა" გაიმარჯვონ:



"ძვირფასო "მანჩესტერ იუნაიტედ"
გთხოვთ, დღეს გაიმარჯვოთ
თქვენი პატივისცემით
"ვესტ ჰემ იუნაიტედი"