"მანჩესტერ იუნაიტედი" არის ერთ-ერთი კლუბი, რომელიც რომელუ ლუკაკუს შეეფერება და ტრანსფერი ევროპის ჩემპიონატის დაწყებამდე განხორციელდება, აცხადებს თავდამსხმელის მამა.

როჯერ ლუკაკუმ Het Nieuwsblad-ს განუცხადა, რომ "ევერტონი" 23 წლის ფორვარდში, რომელმაც გასულ სეზონში 25 გოლი გაიტანა, 65 მლნ. ფუნტს ითხოვს.

მისი მოლოდინით, "ანდერლეხტისა" და "ჩელსის" ყოფილი ფეხბურთელი "გუდისონ პარკს" ზაფხულში დატოვებს.

როჯერს მიაჩნია, რომ "იუნაიტედი" და მიუნხენის "ბაიერნი" საუკეთესო არჩევანია, თუმცა "ბაიერნს" გარკვეული უპირატესობა აქვს იმ მხრივ, რომ მომდევნო სეზონს ჩემპიონთა ლიგაზე გაატარებს - ტურნირზე, სადაც "იუნაიტედი" ვერ მოხვდა.

"ევერტონი 65 მლნ. ფუნტს ითხოვს რომისთვის. ვფიქრობ, ტრანსფერი ევროპის ჩემპიონატის დაწყებამდე განხორციელდება.

იმედი მაქვს და მჯერა, რომ მინო რაიოლა (ლუკაკუს აგენტი) სამართლიანი იქნება და მოთამაშის ინტერესებს საუკეთესოდ დაიცავს.

თავის მომავალს რომელუ გადაწყვეტს, მაგრამ ხშირად აგენტს ეკუთვნის ბოლო სიტყვა. იმედი მაქვს და ვფიქრობ, რომ მინო რაიოლა პატიოსანი ადამიანია.

ახლა ყველაფერი სწრაფად გადაწყდება. არის თუ არა ტრანსფერი უკვე გადაწყვეტილი? თითქმის. ვფიქრობ, ევროპის ჩემპიონატის დაწყებამდე ყველაფერი ცხადი იქნება.

ამჟამად, მიმაჩნია, რომ მისთვის საუკეთესო კლუბი "ბაიერნი" ან "მანჩესტერ იუნაიტედია".

განსაკუთრებით "ბაიერნი", რადგანაც ეს კლუბი ყოველ წელს მინიმუმ ჩემპიონთა ლიგის ნახევარფინალში გადის და რომელუს ბუნდესლიგაც კარგად მოერგება. არა მგონია, იტალიაში გადავიდეს, იქ თამაში ძალიან ნელია".

წყარო: M.E.N.