მაიკლ კერიკმა "ვესტ ჰემთან" "მანჩესტერ იუნაიტედის" დამარცხების გამო იმედგაცრუება გამოხატა.

"წითლები" მატჩის დასრულებამდე 20 წუთით ადრე 2-1 იგებდნენ, მაგრამ "ჩაქუჩებმა" დარჩენილ დროში ორი უპასუხო ბურთის გატანა შეძლეს და შეხვედრა 3-2 მოიგეს. მაიკლ ანტონიომ და უინსტონ რიდმა დე ხეას კარი თავური დარტყმით აიღეს, კერიკი კი ფიქრობს, რომ მისი თანაგუნდელები სტანდარტულ მდგომარეობას ვერ გაუმკლავდნენ.

"კარგი არ არის, რაც მოხდა. მატჩში დავბრუნდით, მაგრამ მერე ჩვენს თავს ვერ დავეხმარეთ და ბევრჯერ დავარღვიეთ თამაშის წესი. უფრო ჭკვიანურად უნდა გვეთამაშა.

ბურთის საჯარიმოში ჩატანის საშუალებას ვაძლევდით, რაც ჩვენზე ზეწოლას ზრდიდა. ბოლოს სწორედ ამის ხარჯზე მოიგეს მატჩი, ჩვენ კი იმედგაცრუებულები დავრჩით", - განაცხადა კერიკმა.

"იუნაიტედმა" დიაფრა საკჰოს მიერ გატანილ გოლს ენტონი მარსიალის დუბლით უპასუხა, რამაც კერიკი მოხიბლა.

"კვლავ ბრწყინვალე იყო. ნამდვილად სახიფათოა, არა? შესანიშნავი სეზონი აქვს".

მატჩი ავტობუსზე თავდასხმის გამო 45 წუთით გვიან დაიწყო, ვიდრე მოსალოდნელი იყო. კერიკი ამას თავის გამართლების საშუალებად არ მიიჩნევს: "მატჩის დაწყებამდე რაც უნდა მომხდარიყო, ამას უნდა შევგუებოდით. აქ ვიყავით, მზად ვიყავით და მოსამზადებლად ერთ საათზე მეტი გვქონდა. ეს არ არის გამართლების მიზეზი.

მატჩს 2-1 ვიგებდით, საბოლოოდ გამარჯვების მოპოვება სავსებით შესაძლებელი იყო. დავწინაურდით და ეს უნდა შეგვენარჩუნებინა. უკეთესად უნდა გვეთამაშა. თამაში უნდა მოგვეკლა, მატჩი გაგვეკონტროლებინა, მაგრამ მათ შეხვედრაში დაბრუნების საშუალება მივეცით".

წაგების შემდეგ "იუნაიტედი" მეოთხე ადგილზე მყოფ "მანჩესტერ სიტის" ორი ქულით ჩამორჩება, სეზონის დასრულებამდე კი ერთადერთი მატჩია დარჩენილი.

"ყურადღება არ უნდა მოვადუნოთ, ახლა ასეთი სიტუაცია გვაქვს. "ვესტ ჰემთან" მატჩამდე ყველაფერი ჩვენს ხელთ იყო, მაგრამ ხელიდან გავუშვით. ჩვენი ბოლო მატჩი უნდა მოვიგოთ და მერე ვნახავთ, რა მოხდება"

წყარო: manutd.com