ლუი ვან გაალი "მანჩესტერ იუნაიტედში" ტიმოთი ფოსუ-მენსასთვის საუკეთესო პოზიციის შერჩევას ჯერ კიდევ ახერხებს და აღნიშნავს, რომ ახალგაზრდა ჰოლანდიელი ბასტიან შვაინშტაიგერს აგონებს.

"იუნაიტედის" გულშემატკივარი, რომელიც ფოსუ-მენსას აღმავლობას ადევნებდა თვალს, მას ცენტრალურ მცველად, ფლანგის მცველად და ცენტრალურ ნახევარმცველად იხილავდა კლუბის 18, 21-წლამდელთა და პირველი გუნდის რიგებში.

როცა ხუთშაბათს გამართულ პრესკონფერენციაზე ჰკითხეს, ფოსუ-მენსას მომავალი ნახევარდაცვაში თამაში იყო თუ არა, მწვრთნელმა განაცხადა, რომ 18 წლის ფეხბურთელისთვის ჯერ ყველა პოზიცია ვაკანტურად რჩება.

"ეს გუნდში ვაკანტურ ადგილებზეა დამოკიდებული. ჩემს გუნდში ნახავდით, რომ ფეხბურთელები ადრეულ კარიერასთან შედარებით განსხვავებულ პოზიციაზე თამაშობდნენ. ეს ცოტა იღბალზეცაა დამოკიდებული. როცა გაქვს ვაკანტური ადგილი და ფიქრობ, რომ ახალგაზრდა ფეხბურთელს იქ თამაში შეუძლია, მას შანსი უნდა მისცე. თუ ამ შანსს იყენებს, უკვე მენტალურად კარგი ფეხბურთელი ხდება.

ვერ იტყვი, რომ ფეხბურთელი მხოლოდ ფლანგის მცველია. უნდა დაინახო უნარები, პოზიციური პროფილი შექმნა და შემდეგ ამ ფეხბურთელის უნარებს უნდა დააკვირდე, რათა დარწმუნდე, ერგება თუ არა პოზიციას. შეძლებს, შეასრულებს? იქნებ შეძლოს, მერე კი ამ პოზიციას მიეჯაჭვება და ის საუკეთესო ხდება.

ჰკითხეთ ბასტიან შვაინშტაიგერს, რომელიც "ბაიერნში" მარჯვენა ფლანგზე, მარჯვენა ვინგერად თამაშობდა. მე ცენტრალურ ნახევარმცველად ვაქციე, რადგან მის პროფილს შევხედე და ვიფიქრე, რომ შუაში უკეთესად ითამაშებდა და ამისგან უფრო მეტი სიამოვნება მიიღო, ვიდრე მარჯვენა ფლანგზე თამაშისგან. ბევრ ფეხბურთელს შევუცვალე პოზიცია", - განაცხადა ჰოლანდიელმა მწვრთნელმა.

წყარო: manutd.com