ლუი ვან გაალმა ბოდიში მოუხადა "ტოტენჰემს" იმის გამო, რომ "უაით ჰარტ ლეინზე" მუშაობას "ოლდ ტრაფორდზე" გადასვლა ამჯობინა.

ვან გაალის თქმით, 2014 წელს "ოლდ ტრაფორდზე" ვაკანტური ადგილის დაკავებამდე "ტოტენჰემში" მუშაობას აპირებდა.

ჰოლანდიელი ახლოსაც კი არ არის იმ წარმატებასთან, რომელსაც "აიაქსთან", "ბარსელონასა" და მიუნხენის "ბაიერნთან" ერთად აღწევდა, ხოლო მაურისიო პოჩეტინოს "ტოტენჰემი" სულ უფრო და უფრო ძლიერდება.

ეს კიდევ ერთხელ დადასტურდა "იუნაიტედთან" შეხვედრაში, როცა დელე ალიმ, ტობი ალდერვეირელდმა და ერიკ ლამელმაც ექვს წუთში სამი გოლი გაიტანეს და "წითელი ეშმაკები" 3-0 გაანადგურეს.

ლონდონში განცდილი მარცხი ნიშნავს, რომ "მანჩესტერ იუნაიტედმა" უკვე დაკარგა ჩემპიონობის ყოველგვარი შანსი, რაც ავტომატურად ნიშნავს იმას, რომ ჩემპიონობისთვის მებრძოლი "ლესტერ სიტი" ჩემპიონთა ლიგის ზონაში მოხვდა.

ნატჩის შემდგომ ვან გაალს ჰკითხეს, ხომ არ ნანობდა "ტოტენჰემისთვის" უარის თქმას და სამუშაოდ "იუნაიტედში" გადასვლას, რაზეც მწვრთნელმა უპასუხა: "ვფიქრობ, "ტოტენჰემს" ბალანსში ჯერ კიდევ ვჯობნით. თქვენ კი ერთი მატჩის შემდეგ მეკითხებით, ის უფრო დიდი გამოწვევა იყო თუ არა?

უფრო დიდი გამოწვევა უფრო დიდ კლუბშია. "ტოტენჰემი" მომწონდა და დანიელ ლევიმ ეს იცის, მაგრამ მე დიდი გამოწვევები მომწონს და "მანჩესტერ იუნაიტედი" უფრო დიდი კლუბია.

"ტოტენჰემს" ბოდიშს ვუხდი, მაგრამ "მანჩესტერ იუნაიტედი" ყოველთვის უფრო დიდი კლუბი იქნება და სამწუხაროა, რომ ამაში დაეჭვების საფუძველი მხოლოდ 3-0 წაგებამ მოგცათ".

წყარო: goal.com