მაიკლ კერიკი გამოტყდა, რომ ევროპის 2016 წლის ჩემპიონატზე მოსახვედრად ბრძოლა მოუწევს.

როი ჰოჯსონმა "მანჩესტერ იუნაიტედის" ნახევარმცველი გერმანიისა და ჰოლანდიის ნაკრებების წინააღმდეგ გასამართი ამხანაგური მატჩების განაცხადში არ შეიყვანა.

ბოლოს, როცა კერიკი ნაკრებში გამოიძახეს, ინგლისელმა ტრავმა მიიღო. ეს გასული წლის ნოემბერში მოხდა. ამჯერად ჰოჯსონმა არჩევანი "ტოტენჰემის" მოთამაშე ერიკ დაიერსა და "ლესტერის" ნახევარმცველ დენი დრინქუოტერზე შეაჩერა.

მაიკლი გამოტყდა, რომ საფრანგეთში გამგზავრების იმედი ჯერ კიდევ აქვს: "როი ჰოჯსონს ვესაუბრე, ყველაფერი სამართლიანია. თავისი გადაწყვეტილების მიზეზები ამიხსნა და მისი მესმის. რამდენიმე თავისუფალი დღე მაქვს, დავისვენებ, ოჯახთან ერთად სადმე წავალ, სანამ სამუშაოს კვლავ შევუდგები.

მაგრამ ეს ეხება ყველას, ვინც გუნდში არ არის. ზაფხულამდე ბევრი რამ შეიძლება შეიცვალოს. წინ რამდენიმე დიდი მატჩია, თანმიმდევრული უნდა ვიყო".

"მანჩესტერ იუნაიტედიდან" ინგლისის ნაკრებში მხოლოდ კრის სმოლინგი ითამაშებს.

წყარო: telegraph