„იუნაიტედმა“ სატრანსფერო ფანჯრის დახურვამდე რამდენიმე საათით ადრე უზარმაზარი თანხის გადახდის სანაცვლოდ გაიფორმა ანტონი მარსიალი. თანხის რაოდენობა საფეხბურთო სამყაროს გადაჭარბებულად მიაჩნდა, მან კი ხუთ მატჩში ოთხი გოლით პირველივე თვეში დაამტკიცა, რომ მისი ღირებულება გადაჭარბებული არ არის.
„ის ბევრად უფრო მნიშვნელოვანი აღმოჩნდა, ვიდრე მეგონა. ძალიან კმაყოფილი ვარ“ - თქვა ლუი ვან გაალმა „სანდერლენდთან“ მატჩის შემდეგ, სადაც ანტონიმ რუნის გაატანინა.

შეუძლია კი ფრანგ ახალგაზრდას მიმდინარე სეზონში „იუნაიტედის“ წარმატების გასაღები გახდეს? ცხადია, ხუთი მატჩის ანალიზი მცირეა გრძელვადიანი და დამაჯერებელი პროგნოზის გასაკეთებლად, თუმცა საკმარისია იმის გასარკვევად, თუ რა შეუძლია ანტონის ამა თუ იმ ასპექტში.

გოლები

მარსიალის სტარტით კმაყოფილმა ლუი ვან გაალმა დამაჯერებლად შეადარა ის პატრიტ კლუივერტს, რომელმაც ჩემპიონტა ლიგის ფინალში 18 წლის ასაკში გაიტანა გოლი: „რა თქმა უნდა, შეგვიძლია მარსიალის კლუივერტთან შედარება, ამის გაკეთება შეგვიძლია, რადგან კლუივერტიც ფანტასტიკური მოთამაშე იყო, ათლეტური აღნაგობით, ისიც თავიდანვე იტანდა გოლებს“.
მარსიალს 21 წუთი დასჭირდა პირველი გოლის გასატანად, თანაც, „ლივერპულთან“. მან ვერ გამოიყენა შანსი გამხდარიყო „იუნაიტედის“ პირველი ფეხბურთელი 43 წელიწადის განმავლობაში, რომელმაც ზედიზედ გაიტანა სეზონის პირველ სამ მატჩში გოლი. მას ამჯერად ყველა ჩემპიონატში ერთად 315 წუთში ოთხი გოლი აქვს, რაც ნიშნავს, რომ საშუალოდ ყოველ 90 წუთში გააქვს გოლი.

ასისტები

როგორც ჩანს, გატანასთან ერთად, მას საგოლე მომენტების შექმნაც შესძლებია. „სანდერლენდთან“ საჯარიმოში მან ჯერ ერთი მცველი დაჯაბნა ფიზიკურად, მეორე კი ტექნიკურად მოატყუა და კაპიტანს გაატანინა. ამავე შეხვედრაში გაიყვანა მემფის დეპაი პირისპირ მეკარესთან. გულშემატკივრისთვის სასიამოვნო საყურებელია, როგორ თამამად და უშეცდომოდ ინარჩუნებს ბურთს მარსიალი მეტოქის საჯარიმოში. ანტონიმ უფრო მეტი მომენტი შექმნა „სანდერლენდთან“ მატჩში, ვიდრე მისმა ნებისმიერმა მეტოქემ.

მხოლოდ ხუან მატამ შექმნა იმდენი საგოლე მომენტი „იუნაიტედისთვის“ მთელი სეზონის განამვლობაში, რამდენიც მარსიალმა „სანდერლენდთან“ მეორე ტაიმში.
„ის ერთ-ერთი მიზეზია მოპოვებული სამი ქულისა. მას საგოლე მომენტების შექმნაც შეუძლია“ - განაცხადა ჰოლანდიელმა სპეციალისტმა „შავი კატების“ დამარცხების შემდეგ.


ფიზიკური სიძლიერე

მარსიალს გოლები რომც არ გაეტანა და ასისტი არ გაეკეთებინა, ის შთაბეჭდილებას მაინც მოახდენდა. „ანტონი მხოლოდ გოლების გამტანი არ არის, ის შეტევის ეფექტურობაში დიდ როლს თამაშობს“ - თქვა ვან გაალმა. მართლაც, მარსიალმა გასულ შეხვედრაში თითქმის ყველა ბრძოლა მოიგო. რუნის გოლის დროს, ფაბიო ბორინის შეჯახების მომენტში კარგად გამოჩნდა მისი ფიზიკური სიძლიერე. არ დაგვავიწყდეს დე ხეას ფიზიკური აღნაგობა „იუნაიტედში“ გადმოსვლის დღეს, იანუზაის სისუსტე პირველ სეზონში. მარსიალი 19 წლისაა და მისი ეს მაჩვენებელი ინგლისში, „მანჩესტერ იუნაიტედში“ ბევრად გაუმჯობესდება.

მოძრაობები

მიუხედავად იმისა, რომ მარსიალი ცენტრ ფორვადია, ფლანგებზე მისი აქტიურობა დიდ როლს თამაშობს გუნდის წარმატებაში. გასულ მატჩებში კარგად გამოჩნდა, რომ მისი მოძრაობები ერთ-ერთი გამორჩეული პლუსია ამ მოთამაშეში. მარსიალი ცდილობს ბურთის მიღებისთანავე წამოიწყოს დრიბლინგი, გარბენა, ეხერხება ერთი შეხებით პასის გაკეთება. ანტონის ჭკვიანი ფეხბურთელი შეიძლება ვუწოდოთ, რომელიც არა განსაკუთრებული ფინტებით, არამედ საკუთარი მოძრაობებით ატყუებს მეტოქეს. ეს კი ფოტო, სადაც ჩანს მარსიალის ბურთზე შეხების წერტილები.



სიმშვიდე

მარსიალმა ხუთი დარტყმიდან ოთხი გოლი გაიტანა, როცა რუნის და მემფისმა ჯამში 26-ჯერ დაარტყეს კარში და ორჯერ გაიტანეს. თინეიჯერი ბრწყინვალე შემსრულებელია, მისი სიმშვიდე და სიზუსტე გოლის გატანის მომენტში საოცარია.
„ვერ წარმოვიდგენდი, რომ მოედანზე ის ასეთი მშვიდი იქნებოდა. თუ შევხედავთ მის საგოლე სტატისტიკას „იუნაიტედში“ გადმოსვლამდე, ვერ ვიფიქრებთ, რომ ის ასეთი დონის შემსრულებელია. ვუყურებ მას და ვფიქრობ, თითქოს წინასწარ იცოდა რომ ასე მოხდებოდა და სიტუაციას სრულად აკონტროლებს“ - განაცხადა გარი ნევილმა.
„ლიონში“ და „მონაკოში“ ერთად, ჯამში, მარსიალმა 72 მატჩიდან 15 გოლი გაიტანა - აქედან უმეტესობა ცვლილებაზე შესულმა ან ვინგერად მოთამაშემ.



დამოკიდებულება

მარსიალი „იუნაიტედმა“ ყველაზე ძვირადღირებული თინეიჯერი გახადა. ვან გაალისგან ვიგებთ, თუ როგორი დამოკიდებულება აქვს ანტონის საკუთარ პასუხისმგებლობასთან მიმართებაში.



„პიროვნულად ის გახსნილი ბიჭია, ვარჯიშებზე ანტონი ისმენს ყველაფერს, უყურებს, აკვირდება, კონცენტრაციას ახდენს. მწვრთნელისთვის, ასეთ მოთამაშესთან მუშაობა სასიამოვნოა.“ კარიერის მანძილზე ვან გაალის გამორჩეული ყურადღება ბევრმა ახალგაზრდამ მოიპოვა და როგორც ჩანს, მარსიალიც ერთ-ერთი მათგანია.

წყარო: skysports.com