"მანჩესტერ იუნაიტედი" "მონაკოს" ფეხბურთელის, ფაბინიოს ტრანსფერს განიხილავს.

დაცვის მარჯვენა ფლანგზე არსებული პრობლემის ბრაზილიელი ფეხბურთელის დახმარებით მოგვარებისთვის "იუნაიტედის" მთავარ მწვრთნელ ლუი ვან გაალს 20 მლნ. ფუნტის გადახდა მოუწევს.

ფაბინიომ "მონაკოში" "რიუ ავედან" იჯარის წესით განათხოვრების შემდეგ ორი წელი გაატარა, გასულ თვეს კი ფრანგებისგან კონტრაქტი მიიღო. "მონაკომ" ფეხბურთელი 4.2 მლნ. ფუნტის სანაცვლოდ შეიძინა და მისი მოქმედი კონტრაქტი 2019 წლამდე გრძელდება.

L’Equipe იტყობინებოდა, რომ "იუნაიტედმა" თავდაპირველად 10 მლნ. ფუნტის ოდენობის შეთავაზება გააკეთა, თუმცა ფრანგულმა მხარემ თანხის გაორმაგება მოითხოვა ფეხბურთელში, რომელიც ამჟამად კოპა ამერიკაზე ბრაზილიის ნაკრების ღირსებას იცავს.

მარჯვენა მცველის წარმომადგენელი აგენტი ხორხე მენდეშია, რომელსაც "იუნაიტედთან" წარსულში ახლო კავშირი ჰქონდა.

წყარო: dailymail