სეზონის მეორე ნახევარში, ლუის ვან გაალმა გულახდილად ისაუბრა და აღნიშნა, რომ მის გუნდს სჭირდება ტიპიური გამტანი ფორვარდი:

"ეს ასეა, რადგან მე ამას ვერ ვუარყოფ. ვერც რობინი უარყოფს ამას, ვერც ფალკაო, ხოლო რუნის ხშირად არ უწევს ამ პოზიციაზე თამაში. ჩვენ არ გვყავს ფორვარდი, რომელიც თავისუფლად შეძლებს სეზონში 20 გოლის გატანას."

გუნდმა უკვე გაიფორმა მემფის დეპაი, რომელიც ინგლისში ერედივიზიონის საუკეთესო ბომბარდირის სტატუსით ჩავიდა, თუმცა "ეშმაკებს" კვლავ გოლეადორის ძიებაში არიან.

რამდენი მოთამაშეა, რომელმაც გასულ სეზონში 20 გოლის გატანა მოახერხა? და რომელი მათგანი შეიძლება აღმოჩნდეს წითელ ფორმაში?

ჩვენ შემოგთავაზებთ მოთამაშეებს ევროპიდან, რომლებმაც ზემოთ აღნიშნული "მისია" შეასრულეს:

ესპანეთი

20+ გოლი: კრიშტიანუ რონალდუ(48), ლეო მესი(43), ნეიმარი(22), ანტუან გრიზმანი(22), კაროს ბაკა(20).

თუკი ვინმეს მესის ან ნეიმარის ყიდვა აქვს გადაწყვეტილი, წარმატებებს გისურვებთ. ამ ორმა შემტევმა, სუარესთან ერთად შექმნა ტრიო, რომელიც ალბათ მსოფლიოში საუკეთესოა.

მათ გარდა არის რონალდუ, რომელიც წითლებს ყველა სეზონში გარანტირებულად 20-ზე მეტ გოლს მისცემს. პორტუგალიელმა გასულ სეზონში უინგერობაზე თითქმის უარი თქვა და 9-იანად ჩამოყალიბდა. მისი გადმობირება ძალიან გაჭირდება, თუმცა შანსი მაინც არსებობს.



ორ ესპანურ გიგანტს "ატლეტიკო მადრიდი" მოსდევს, რომელსაც თვისი გმირი ჰყავს - ეს ანტონ გრიზმანია, რომელმაც 22 გოლის გატანა შეძლო და რონალდუს მსგავსად ფლანგიდან ცენტრისკენ შეიწია. მან წლევანდელი მონაგარით ქარიმ ბენზემასაც კი აჯობა, რომელსაც 7-წლიანი ესპანური კარიერის მანძილზე ერთ სეზონში 22 გოლი არასდროს გაუტანია. გრიზმანი ჯერ 23 წლისა არის და განვითარება კიდევ შეუძლია.



და ბოლოს, თუკი "იუნაიტედის" ხელმძღვანელობა კოლუმბიურ საბადოში კიდევ ერთხელ ჩაიხედავს, კარლოს ბაკას აღმოაჩენს, რომელმაც ლომის წვლილი შეიტანა ევროპა ლიგის მოგებაში და პრმერაშიც საკმაო რაოდენობის გოლი გაიტანა.

28-წლის სამხრეთ ამერიკელი რეგულარულად იტანდა გოლებს ბელგიაშიც და კოლუმბიაშიც, ასე რომ ახლა პრემიერ ლიგაშიც შეუძლია ძალების მოსინჯვა.

ხმაურიანი სამეზობლო

20+ გოლი: ალექს ლაკაზეტე(27), ჯექსონ მარტინესი(21), ჯონას ოლივეირა(20).

ალექსი, წელს ლიგა 1-ის ვარსკვლავი იყო, მან 27 გოლის გატანა მოახერხა და უკან ჩამოიტოვა ზლატანი, კავანი და სხვანი. ის 24 წლისაა, ამბიციური, ახალი გამოწვევები არ აშინებს და მსურველებს მწვანე შუქიც აუნთო. "ლიონის" პრეზიდენტს დიდად არ სურს მისი გაყიდვა, თუმცა ყოველი შემთხვევისთვის 35 მილიონიანი იარლიყი ჩამოჰკიდა.



პორტოს, კვლავ ნიჭიერი და ტოპ-კლასის შემტევი ჰყავს, ჯექსონ მარტინესს უკვე უკავშირებენ "იუნაიტედს", თუმცა მისი შეძენა "არსენალის" მესვეურებსაც სურთ, კოლუმბიელი 25 მილიონი ღირს.

ჯონას ოლივეირა წინა ორთან შედარებით ადვილი და იაფი შენაძენი იქნება, თუმცა თუკი მის ესპანურ კარიერას გავიხსენებთ, აღმოვაჩენთ რომ ძლიერ ლიგაში თამაში უჭირს, ამასთან 31 წლის თავდამსხმელი მომავალზე გათვლილი ოფცია ნამდვილად არ არის.

სერია ა

20+ გოლი: კარლოს ტევესი(21), ლუკა ტონი(20), მაურო იკარდი(20)

კარლოს ტევესს "იუნაიტედის" მაისური ტარება უკვე გამოცდილი აქვს, უკან დაბრუნება კი არც მას და არც გულშემატკივარს არ სურს.

ლუკა ტონიმ, მოულოდნელად საოცარი სეზონი ჩაატარა, თუმცა მისი შესაძლო ვარიანტად განხილვა სისულელეა. გარდა იმისა, რომ იტალიელი უკვე 38 წლის არის, მას ვან გაალთან ცუდი ურთიერთობა აქვს. "ბაიერნში" გატარებულმა წლებმა მათ მებობრობას წერტილი დაუსვა.



ამ ყველაფრის გათვალისწინებით, რჩება მაურისიო იკარდი. 22 წლის არგენტინელს ძალიან კარგი სეზონი გამოუვიდა და მიუხედავად "ინტერის" წარუმატებლობისა, მან გრანდების ყურადღება მაინც მიიქცია. მან განაცხადა, რომ ძალიან სურს ჩემპიონთა ლიგაზე თამაში, ამჟამინდელი კლუბი კი, მომდევნო სეზონში, ამ სურვილს ვერანაირად ვერ აუსრულებს.

სახლთან ახლოს

20+ გოლი: სერხიო აგუერო(26), ჰარი კეინი(21), დიეგო კოშტა(20)

სერხიო და დიეგო შეგვიძლია სიიდან ახლავე ამოვშალოთ, რადგან ისინი "იუნაიტედის" უშუალო მეტოქეების რიგებს იცავენ, რომლებსაც მომავალ წელსაც სურთ "წითლების" უკან მოტოვება.



გადმოვა ჰარი კეინი? "მანჩესტერ იუნაიტედმა" ინგლისელი ტალანტის მიმართ ინტერესი ღიად დაადასტურა, თუმცა ერთი კარგი სეზონით განსჯა, შესაძლოა დამღუპველი აღმოჩნდეს. ჰარიმ განაცხადა, რომ ბედნიერია ლონდონში და არსად წასვლას არ გეგმავს, თუმცა ყველაფერი შეიძლება მოხდეს.

რომელი თავდამსხმელი უნდა გაიფორმოს კლუბმა?

ანტონ გრიზმანი

კარლოს ბაკა

ალექს ლაკაზეტე

ჯექსონ მარტინესი

მაურო იკარდი

ჰარი კეინი

ხმის მიცემა შედეგები