„მანჩესტერ იუნაიტედი“ ახლოსაა ჩემპიონთა ლიგის საგზურთან, რაც „ბარნლის“ თავდამსხმელის, დენი ინგსის გადმობირების შანსებს მნიშვნელოვნად ზრდის და „იუნაიტედს“ დიდ უპირატესობას ანიჭებს.

22 წლის ინგლისელს, მოქმედი კონტრაქტის ვადა მიმდინარე სეზონის დასრულებისას ეწურება, რამაც რამდენიმე ტოპ კლუბის მის მიმართ ინტერესი კიდევ უფრო გაზარდა. მისმა შთამბეჭდავმა დებიუტმა კი, პრემიერ ლიგაში „იუნაიტედის“ ყურადღებაც მიიბყრო.

“The daily telegraph”-ის მტკიცებით სწორედ „იუნაიტედია“ ლიდერი დენი ინგსისთვის ბრძოლაში, რადგან ლუის ვან გაალის გუნდი, დიდი ალბათობით მომავალ სეზონში ჩემპიონთა ლიგაზე იასპარეზებს.

ამჟამად „წითელი ეშმაკები“ მესამე ადგილზე იმყოფებიან სატურნირო ცხრილში და 8 ქულით უსწრებენ მეხუთე ადგილოსან „ლივერპულს“. „იუნაიტედის“ შესანიშნავი ფორმა კი, სეზონის ოთხეულში დასრულების წინაპირობას იძლევა.

როგორც მოსალოდნელია, ვან გაალი სეზონის დასრულების შემდეგ, თავდასხმის ხაზში მნიშვნელოვან ცვლილებებს განახორციელებს, შედეგად რობინ ვან პერსი და რადამელ ფალკაო კლუბს დატოვებენ, ხოლო კლუბის ერთადერთ, სანდო თავდამსხმელად უეინ რუნი დარჩება.

კლუბს სავარაუდოდ კიდევ ერთი თავდამსხმელი ჩიჩარიტოც დატოვებს, რომელიც ამჟამად ერთ წლიანი არენდით, მადრიდის „რეალის“ ღირსებას იცავს.

metro.co.uk