პსვ-ს მთავარ მწვრთნელს, ფილიპ კოკუს მიაჩნია, რომ მისი გუნდის ამომავალი ვარსკვლავი ზაფხულში სხვა კლუბში გადაბარგდება.

21 წლის დეპაი მიმდინარე სეზონს ბრწყინვალედ ატარებს. მარჯვენა თავდამსხმელის ან ვინგერის პოზიციაზე მოთამაშე მემფისს 23 თამაშში 18 გოლი აქვს გატანილი.

ახალგაზრდა ფეხბურთელის შეძენის მთავარ კანდიდატად "მანჩესტერ იუნაიტედი" სახელდება, რომლის მთავარმა მწვრთნელმა, ლუი ვან გაალმა თავის დროზე მემფისს ჰოლანდიის ნაკრებში სადებიუტო მატჩის ჩატარების საშუალება მისცა. 2014 წლის მსოფლიო ჩემპიონატზე კი დეპაიმ ორი გოლის გატანა მოახერხა.

კოკუ აღიარებს, რომ პსვ დეპაის ზაფხულში დაკარგავს. ფილიპის აზრით, მემფისს შეუძლია არიენ რობენის დონეს მიაღწიოს, რომელიც ასევე დიდი ხნის განმავლობაში ითვლებოდა "იუნაიტედის" სამიზნედ.

"ისეთი დონის ფეხბურთელების დაკარგვა, როგორიც მემფისია, ყოველთვის საწყენია. მეორეს მხრივ, ჩვენ, როგორც კლუბს სიამაყის საბაბი გვაქვს. ის არის ჩვენი აკადემიის აღზრდილი, სადაც ყველა საფეხური გაიარა და პირველი გუნდის ყველაზე მნიშვნელოვანი ფეხბურთელის სტატუსამდე მიაღწია. ჰოლანდია სწორედ ახალგაზრდა ფეხბურთელების აღზრდითა და განვითარებით არის ცნობილი.

მაგრამ რაღაც მომენტში ნათელი ხდება, რომ ბიჭმა მომდევნო ნაბიჯი უნდა გადადგას. ვფიქრობ, მომდევნო სეზონში დეპაი პსვ-ს დატოვებს და უფრო სერიოზულ ლიგასა და მაღალი დონის გუნდში გადავა. თუმცა მისი განვითარებისთვის მთავარი არ იქნება ლიგა. უფრო მნიშვნელოვანია მის დონეს შეესაბამებოდეს გუნდის სათამაშო სტილი, სადაც ის გადავა.

შეუძლია თუ არა დეპაის რობენის დონემდე მისვლა? ვფიქრობ, კი. ვერ ვუწოდებდი მსგავს ფეხბურთელებს, მაგრამ პოზიცია შეტევის ფრთაზე, სისწრაფე, დარტყმა - ესენი მსგავსია. ორივე მათგანს ძალიან სურდა სწავლა და განვითარება. არც რობენი და არც დეპაი ვარჯიშებზე თავს არ ზოგავენ, რადგან იციან, რამდენის მიცემა შეუძლია მათთვის ვარჯიშს. თუმცა მემფისი მხოლოდ 21 წლისაა და უფრო სერიოზული დასკვნების გაკეთება მხოლოდ რამდენიმე წლის შემდეგ შეიძლება." - განაცხადა ფილიპ კოკუმ.

წყარო: fapl.ru