მართალია, FA თასის მეხუთე რაუნდის მატჩი "პრესტონის", წინააღმდეგ არ იყო ანდერ ერერას საუკეთესო მატჩი "იუნაიტედის" რიგებში და ფანები უფრო მეტს ითხოვენ ახალგაზრდა ესპანელისგან, მაგრამ ის სწრაფი თამაში, რასაც ეს ბიჭი სთავაზობს გუნდს ნამდვილად სჭირდება "იუნაიტედს".

აქ არის 5 მიზეზი, თუ რატომ უნდა დაიწყოს ანდერ ერერამ "სუონსისთან" გასამართი შეხვედრა პირველივე წუთებიდან:

გოლები

მას შემდეგ რაც ანდერ ერერა ესპანური "ბილბაოს ატლეტიკიდან", სადაც 128 შეხვედრაში 11 გოლის გატანა მოახერა, ინგლისში გადაბარგდა, 4-ჯერ მეტოქის კარის აღება და ამდენჯერვე საგოლე პასის გაკეთება მოასწრო და ამასთან მან მხოლოდ 8 შეხვედრა დაიწყო ძირითად შემადგენლობაში. მისი გოლი გუშინდელ მატჩში იყო ერთ-ერთი გარდამტეხი მომენტი, რომელმაც საბოლოოდ "იუნაიტედს" გამარჯვების მუხტი მისცა. ეს მისი პირველი გოლი არ ყოფილა თასის გათამაშებაში, მან "იოვილის" კარიც აიღო ძალიან ლამაზი გოლით.

გამარჯვების პროცენტულობა

სტატისტიკურად, ერერა გუნდის გამარჯვებაში ერთ-ერთი მთავარი ფიგურაა. "იუნაიტედმა" მოიგო მატჩების 65 პროცენტი, როდესაც ესპანელი მოედანზე იმყოფებოდა, ხოლო როცა ვან გაალი მას სათადარიგოთა სკამზე ტოვებდა გუნდი მხოლოდ 42 პროცენტ შემთხვევაში აღწევდა წარმატებას. საშაბათო შეხვედრაში "სუონსისთან" გამარჯვებამ შესაძლოა "იუნაიტედს" მისცეს "სიტისთან" კიდევ უფრო მიახლოების შანსი, ამიტომ ერერას ყოფნა შესაძლოა მთავარი მომენტი იყოს.

გუნდის ბალანსი

თანამედროვე ფეხბურთში, ნახევარმცველები ძირითადად ორ კატეგორიად იყოფიან: შემტევი და დაცვითი ტიპის. ერერა კი არც ერთზე ამბობს უარს. ის ძალიან ჰგავს ძველმოდურ, box-to-box ნახევარმცველებს, რაც სავარაუდოდ ზუსტად ის არის რაც ვან გაალს სჭირდება. ასეთი მოთამაშის ყოფნა, რომელსაც შეუძლია მოედნის ორივე ნახევარზე წარმატებით თამაში, "იუნაიტედს" ძალიან გამოადგება როგორც ბალანსის შენარჩუნებაში, ასევე ბურთის კონტროლში. ამასთან ანდერი გაათავისუფლებს რუნის დაცვითი სამუშაოების შესრულებისგან და უფრო მეტად შეტევაზე ორიენტირებულს გახდის მას.

უეინ რუნის პოზიცია

სხვადასხვა გამოკითხვებში, "იუნაიტედის" გულშემატკივარმა სასურველ ტაქტიკად 4-2-3-1 დაასახელა. ერერას აქვს უნარი 5 განწესებული ნახევარმცველიდან ნებისმიერის როლი მოირგოს, რაც ლუი ვან გაალს მისცემს საშუალებას კაპიტანი გამოიყენოს მთავარ ან მეორად ფორვარდად. "ეშმაკების" ფანებს ნამდვილად არ მოსწონთ, ის ფაქტი, რომ მათმა კაპიტანმა შეწყვიტა გოლების გატანა და მოედნის შუა ნაწილისკენ გადაინაცვლა. სწორედ ესპანელი ნახევარმცველი არის ხსნა.

ალტერნატივის ნაკლებობა

ანდერსონისა და ფლეთჩერის წასვლის, ასევე კერიკის ტრავმის შემდეგ, ლუი ვან გაალს ნახევარდაცვის ზონაში დიდი არჩევანი ნამდვილად არ აქვს. თუ კი ბლინდი ჯანმრთელი იქნება, ის ნამდვილად გამოადგება გუნდს და დაეხმარება დაცვას, ხოლო ერერა არის იდეალური ვარიანტი მის მეწყვილედ, რომელიც გუნდის ტემპს გააკონტროლებს, როგორც ამას თავის დროზე მაგიური პოლი აკეთებდა. ვერც ფელაინიმ და ვერც რუნიმ ვერ გაამართლეს ამ პოზიციაზე, რაღა დარჩენია ვან გაალს? ეს არის სწორედ ის როლი, რომელსაც ყველაზე კარგად ირგებდა ერერა "ბილბაოში" ყოფნისას და დარწმუნებული ვარ ინგლისშიც წარმატებული იქნება.

წყარო: M.E.N