რადამელ ფალკაოსთვის "მანჩესტერ იუნაიტედში" ცხოვრება კარგად მიმდინარეობს. კოლუმბიელი ფორვარდი "მონაკოდან" იჯარის წესით შეუერთდა "იუნაიტედს" და საწყის ეტაპზე სირთულეებს განიცდიდა, თუმცა ბოლო პერიოდში ის რეგულარულად ხვდება სასტარტო შემადგენლობაში.

"იუნაიტედის" უკანასკნელ 5 შეხვედრაში ფალკაომ თამაში სასტარტო შემადგენლობიდან დაიწყო და "ასტონ ვილასა" და "სტოკ სიტის" წინააღმდეგ მატჩებში მის მიერ გატანილმა თითო გოლმა "წითელ ეშმაკებს" ქულა მოაპოვებინა. ფალკაომ პირველად ითამაშა ინგლისის თასზეც, როცა "იოვილ თაუნის" წინააღმდეგ ჩაატარა მატჩი.

გამომდინარე იქიდან, რომ "იუნაიტედს" ყველა ტურნირზე 11 მატჩიანი წაუგებელი სერია აქვს და ფალკაოც ფორმაში შედის, ნაკლებად გასაკვირია, რომ ის "იუნაიტედში" ბედნიერია.

"კარგად ვარ. ჩემი ოჯახიც კომფორტულადაა. მანჩესტერში და კლუბში ყოფნით სიამოვნებას ვიღებთ. ხალხი მე და ჩემს ოჯახს კარგად გვექცევა. ბედნიერები და მოხარულები ვართ."

თუ მისდამი ფეხბურთელების დამოკიდებულების ხილვა გსურთ, ნოემბერში ვარჯიშის ამსახველი ვიდეო შეგიძლიათ იხილოთ, რომელშიც ორ ფეხბურთელს რადამელი ხელში აყვანილი მიჰყავს. ფეხბურთელებს ესმით, თუ რამდენად მნიშვნელოვანია მისი სახით კიდევ ერთი მსოფლიო დონის ფეხბურთელის ყოლა და იმედოვნებენ, რომ ის არაერთ გოლს გაიტანს.

"ჩემი კოლეგები დასაწყისიდანვე კარგად შემხვდნენ. მხარს მიჭერდნენ და ყველაფერში მეხმარებოდნენ, რაც კი მჭირდებოდა. ეს მოთამაშეთა ძალიან თავმდაბალი, კარგი და ღირსეული ჯგუფია, განცვიფრებული ვიყავი იმით, თუ როგორი ადამიანები არიან." - განაცხადა ფალკაომ.

წყარო: manutd.com