"მანჩესტერ იუნაიტედის" ხელმძღვანელმა, ლუი ვან გაალმა განაცხადა, რომ მან პირადად დაუჭირა მხარი ლუკ შოუსა და ანდერ ერერას ტრანსფერს, მაგრამ მომდევნო შესყიდვებს არ დააჩქარებს.

საკმაოდ დიდი ხნის განმავლობაში "ოლდ ტრაფორდს" ტომას ვერმაელენს, მატს ჰუმელსს, სტეფან დე ვრეისა და არტურო ვიდალს უკავშირებდნენ, მაგრამ ლუი ვან გაალს სურს არსებულ გუნდს გაეცნოს და მხოლოდ ამის შემდეგ დაბრუნდეს სატრანსფერო ბაზარზე.

"ჩემი მეთოდი ყოველთვის ერთი და იგივეა. ამჟამად მსურს არსებულ გუნდს გადავხედო. ვიცი როგორ თამაშობენ, მაგრამ არ ვიცი როგორი რეაგირება ექნებათ ვარჯიშებს ჩემეულ მეთოდზე. პირველი სამი-ოთხი კვირის განმავლობაში მინდა დავინახო, თუ რა შეუძლიათ. აი მაშინ კი შესაძლოა სხვა ფეხბურთელებიც შევისყიდო"

"მოთამაშეები, რომლებიც ჩვენ ვიყიდეთ - შოუ და ერერა - უკვე იყვნენ სიაში. მათ შესყიდვას იმიტომ დავუჭირე მხარი, რომ ისინი მომწონს. პირველ რიგში მინდა ვნახო თუ როგორ მიიღებენ ჩემ ფილოსოფიას და რამდენად სწრაფად შეეგუებიან მას".

"ამ დროისათვის თითოეული მათგანის ნახვა ჯერ კიდევ ვერ მოვახერხე, ასე რომ მოვიცადოთ და ვნახავთ. ძალიან მნიშვნელოვანია, რომ მოთამაშეები და მწვრთნელი ერთმანეთს მოერგონ" - ციტირებს ვან გაალის სიტყვებს "იუნაიტედის" ოფიციალური საიტი.

fapl.ru