"მანჩესტერ იუნაიტედის" მთავარი მწვრთნელის ასისტენტი, რაიან გიგზი აცხადებს, რომ მას სურს ბევრი რამ ისწავლოს ლუი ვან გაალისგან და მომავალში მისი ადგილიც დაიკავოს. გასული სეზონი რაიანისთვის ბოლო გამოდგა მის კარიერაში. ახლა 40 წლის უელსელი ლუი ვან გაალთან ერთად "წითელ ეშმაკებს" გაწვრთნის. რაიანი კი თავის გეგმებს არ მალავს.
"ვფიქრობ სამი შესანიშნავი წელი მაქვს იმისთვის, რომ გუნდის გაწვრთნა ვისწავლო. იცით, რომ მამავალში მწვრთნელობა მსურს. ძალიან გამიხარდება თუ ლუი ვან გაალის შემდეგ მე ჩავიბარებ "იუნაიტედს", ეს ძალიან დიდი ბედნიერების მომტანი იქნება ჩემთვის."
"რის სწავლას ვაპირებ ვან გაალისგან? როგორ მოვამზადო გუნდი მატჩებისთვის, როგორ ვავარჯიშო ისინი, ან კიდევ როგორ მოვექცე ლიდერებს. რაც შეიძლება ბევრის სწავლა მსურს ასეთი ადამიანისგან. ჩემთვის ყველაფერი თავიდან იწყება, ამიტომ ეს ძალიან მნიშვნელოვანია."
"მას (ვან გაალს) ძალიან უყვარს შემტევი ფეხბურთის თამაში და ახალგაზრდა ფეხბურთელებთან მუშაობა, რაც "იუნაიტედის" ფილოსოფიას სრულიად ერგება." - განაცხადა გიგზმა MUTV-თან.