"მანჩესტერ იუნაიტედმა" დღეს ოფიციალურად განაცხადა, რომ REUNITED 14 - ს სახელით "მანჩესტერ იუნაიტედი" 12 აგვისტოს 2014/15 წლების სეზონის წინ ამხანაგურ მატჩს გამართავს.
შეხვედრა "ოლდ ტრაფორდზე" ჩატარდება და მასში მონაწილეობას "ვალენსია" და "მანჩესტერ იუნაიტედი" მიიღებენ. ეს შეხვედრა ლუი ვან გაალისთვის პირველი "ოლდ ტრაფორდული" შეხვედრა იქნება "იუნაიტედის" მთავარი მწვრთნელის რანგში. ასევე პირველ საშინაო შეხვედრას ჩაატარებს რაიან გიგზი ჰოლანდიელის ასისტენტის სტატუსით.
"ოლდ ტრაფორდის" პუბლიკა პირველად იხილავს ახალ შენაძენებს, ლუკ შოუსა და ანდერ ერერასაც.
მატჩზე ასევე გამოყოფილი იქნება გასართობი ადგილი, რომლით სარგებლობაც "იუნაიტედის" ნებისმიერი ასაკის გულშემატკივარს შეეძლება. უფრო ვრცელი დეტალები გახმაურებული იქნება უახლოეს კვირებში.
შეხვედრას MUTV დიდი ბრიტანეთისა და ირლანდიის მოსახლეობისთვის პირდაპირ ეთერში გადასცემს. ეს იქნება პირველი შემთხვევა, როცა MUTV "ოლდ ტრაფორდზე" გამართულ შეხვედრას HD ხარისხში უჩვენებს.
"მანჩესტერ იუნაიტედის" მენეჯმენტის დირექტორი, რიჩარდ არნოლდი აცხადებს: "ეს ღონისძიება "ოლდ ტრაფორდზე" ახალი პერიოდის დაწყებას აღნიშნავს. ახალი მწვრთნელი და ახალი ფეხბურთელები საშინაო პუბლიკის წინაშე პირველად წარსდგებიან. REUNITED 14 გულშემატკივართათვის შესანიშნავი შესაძლებლობაა, რომ ამ ახალი ისტორიის ნაწილი გახდნენ."