"იუვენტუსი" მანჩესტერელებს პატრის ევრას სანაცვლოდ 2 მილიონ ევროს სთავაზობს. როგორც ცნობილია, "იუნაიტედის" ახალ მწვრთნელს, ლუი ვან გაალს ფრანგის შენარჩუნება სურს, მაგრამ ფეხბურთელის მეუღლეს ტურინში გადასვლა უნდა. 33 წლის მცველი იტალიაში კვირაში 55,000 ევროს მიიღებს.
იუვენტუსი ევრათი გაძლიერებას გეგმავს
ის ხელფასის სახით 55,000 ევროს მიიღებს
ლუი ვან გაალმა კარგად იცის, თუ როგორი პოპულარობით სარგებლობს ევრა "ოლდ ტრაფორდზე". მას ასევე მოსწონს პატრისის სათამაშო სტილი. ლუკ შოუს გადასვლა "იუნაიტედში" ევრას ნაკლებ სათამაშო დროს უტოვებს. შესაძლოა ეს მთავარი მომენტი გამოდგეს გადაწყვეტილების მიღების დროს. მანჩესტერელები კიდევ ერთ მარცხენა მცველს აკვირდებიან. რიკარდო როდრიგესი "ვოლფსბურგის" ფეხბურთელია და მიმდინარე მსოფლიო ჩემპიონატზე გულშემატკივარს თავი კარგად დაამახსოვრა შვეიცარიის შემადგენლობაში. არგენტინასთან მატჩში მას მესის განეიტრალება ევალებოდა და დავალება კარგად შეასრულა. 21 წლის ფეხბურთელით "ლივერპულიც" დაინტერესდა. "ვოლფსბურგის" ხელმძღვანელობა რიკარდოს გაყიდვას 15 მილიონი ევროს ფარგლებში აპირებს.
"იუნაიტედი" ასევე ცდილობს ჩილელი ვარსკვლავის, არტურო ვიდალის შეძენას 37 მილიონ ევროდ. ვან გაალს სურს ნახევარმცველის შეძენა. ვიდალს ნორმალური მსოფლიო ჩემპიონატი ჰქონდა, იმის გათვალისწინებით, რომ მუნდიალის დაწყებამდე ტრავმა აწუხებდა.
ვან გაალს ვიდალის "ოლდ ტრაფორდზე" ხილვა სურს
ინგლისელები "იუვენტუსს" არტუროს სანაცვლოდ 37 მილიონს სთავაზობენ
როგორც the guardian იუწყება, "იუნაიტედის" ჰოლანდიელი სპეციალისტის მთავარი სამიზნე არგენტინელი ანხელ დი მარიაა, გერმანელ მცველ მატს ჰუმელსთან ერთად. ფეხბურთელების საერთო ფასი დაახლოებით 75 მილიონი ევროა. დი მარია დღეს ჰოლანდიელთა წინააღმდეგ ტრავმის გამო ვერ ითამაშებს. ის ჩემპიონთა ლიგის ფინალში საუკეთესო მოთამაშე გახდა.
მატს ჰუმელსს "ბორუსიასთან" კონტრაქტი 2017 წლამდე აქვს და მის გახანგრძლივებას ჯერ-ჯერობით არ აპირებს. სავარაუდოდ მას დორტმუნდელები გაყიდიან, რადგან მისი უსასყიდლოთ გაშვება არ მოუხდეთ. ჰუმელსის ფასი დაახლოებით 25-30 მილიონი ევროა. ვან გაალი აფასებს მატსის მონაცემებს. სწორედ მისი მუშაობის პერიოდში ირიცხებოდა ჰუმელსი "ბაიერნის" შემადგენლობაში. ასე რომ, ჰუმელსის "ნისლიან ალბიონზე" ხილვა სავსებით შესაძლებელია.
წყარო:
the guardian
dailymail