ინგლისის ნაკრების ყოფილი ნახევარმცველი რობერტ ლი დარწმუნებულია, რომ უეინ რუნი ქვეყნის საუკეთესო ფეხბურთელია და ჰოჯსონმა გუნდი მის გარშემო უნდა ააწყოს.
მუნდიალისთვის მოსამზადებელ ამხანაგურ მატჩებში მწვრთნელმა უეინი სხვადასხვა პოზიციაზე ათამაშა. ამის პარალელურად, ახალგზრდები სტერლინგი, ბარკლი და ლალანა ძირითადში ადგილის მოსაპოვებლად იბრძვიან, რის შედეგადაც რუნიმ გულშემატკივარს ვერ დაუტოვა მოსაწონი შთაბეჭდილება და კრიტიკის საბაბი მისცა. თუმცა, "ნიუკასლის" ყოფილი ფეხბურთელი თვლის, რომ რუნი ჰოჯსონმა აუცილებლად ტრადიციულ პოზიციაზე უნდა დააბრუნოს.
"არ მაინტერესებს რუნიზე რას ამბობენ, რუნი ჩვენი ქვეყნის საუკეთესო ფეხბურთელია და ეს მისი მსოფლიო ჩემპიონატი იქნება. დარწმუნებული ვარ, ის ამისთვის მზადაა. სინამდვილეში, უეინს "მანჩესტერ იუნაიტედის" ჩატარებული სეზონის გამო აკრიტიკებენ, მაგრამ მან ყველაფერი გააკეთა გუნდის დასახმარებლად.
მას იმიტომ აკრიტიკებენ, რომ შესანიშნავი ფეხბურთელია. რუნი უკვე ვათამაშეთ მარცხნივ, ცენტრში, წინ. მოდი ახლა დავაბრუნოთ ტრადიციულ პოზიციაზე და ნება დავრთოთ ითამაშოს თავისი სტილით.
ლიონელ მესი არგენტინის ნაკრების საუკეთესო ფეხბურთელია, მწვრთნელი მას ცენტრში აყენებს და მის გარშემო აწყობს გუნდს. ასე უნდა მოვიქცეთ რუნის შემთხვევაშიც." - განაცხადა რობერტ ლიმ.

წყარო: skysports.com