რაიან გიგზმა გავრცელებული ჭორები უარყო და დაადასტურა, რომ დანი უელბეკის გაყიდვას "მანჩესტერ იუნაიტედი" არ აპირებს.

დანის კარიერა ციფრებში არც ისე წარმატებულია, რამაც მედია კლუბიდან მის შესაძლო წასვლაზე აალაპარაკა. ინგლისელმა "იუნაიტედის" მაისურით 138 მატჩი ჩაატარა და სულ 29 გოლი გაიტანა. 23 წლის თავდამსხმელის ბედს "არსენალს" და "ტოტენჰემს" უკავშირებდნენ, მაგრამ გიგზმა ყველანაირი ჭორი უარყო.
"კლუბი მას არ გაყიდის. "ჰალთან" მატში კიდევ ერთხელ ვაჩვენეთ, რომ ახალგაზრდა ფეხბურთელებისთვის ხელშეწყობა ჩვენი კლუბის ისტორიისა და კულტურის ნაწილია. არ გვინდა ისეთი ფეხბურთელი დავკარგოთ, როგორიც დანი უელბეკია. ჩვენ მისი შენარჩუნება გვინდა, ის ხომ "იუნაიტედში" ცხრა წლის ასაკიდან იმყოფება." - განაცხადა გიგზმა.

გიგზმა ასევე დაადასტურა, რომ კლუბის აღმასრულებელ დირექტორ ედ ვუდვარდთან პოტენციურ საზაფხულო ტრანსფერებს ხშირად განიხილავს.
"ედი ხშირად მეკითხება: 'ამაზე რას ფიქრობ? ეს როგორი ვარიანტია?'. სწორედ ეს არის ჩემი სამუშაოს ნაწილი." - დაასრულა გიგზმა.




წყარო: skysports.com