შოთა არველაძის აზრით, იმ შემთხვევაში, თუ "მანჩესტერ იუნაიტედის" მთავარ მწვრთნელად ვან გაალი დაინიშნება, მისი ასისტენტობისთვის გიგზი საუკეთესო კანდიდატურა იქნება. შოთამ talkSPORT-თან ინტერვიუში ლუისთან გატარებული დრო გაიხსენა, როცა ჰოლანდიელი სამწვრთნელო შტაბში კლუბისთვის ნაცნობ სპეციალისტებს იყვანდა. მისი აზრით, გამონაკლისი არც ამჯერად იქნება. „ვან გაალს მოსწონს ხალხი, რომელიც კლუბს იცნობს. ის ყოველთვის პატივს სცემს პიროვნებებს, რომლებმაც ბევრი იციან გუნდზე და შეუძლიათ მას დაეხმარნონ ისე, როგორც ეს ჩემს შემთხვევაში იყო. როგორც იცით, ჯერ მოთამაშე ვიყავი, შემდეგ კი მისი ასისტენტი. ლუისი ჩემამდეც ასე ირჩევდა თანაშემწეებს. არ ვიცი რას ფიქრობს რაიან გიგზი ამაზე, მაგრამ ჩემი აზრით, ის ვან გაალისთვის შესანიშნავი დამხმარე იქნებოდა, განსაკუთრებით ფეხბურთელებთან ურთიერთობისთვის. გიგზის "მანჩესტერ იუნაიტედში" მოპოვებული გამოცდილების გათვალისწინებით, ის მთავარ მწვრთნელს ბევრად უფრო მეტ დახმარებას გაუწევს, ვიდრე ახალი სახე." - განაცხადა შოთა არველაძემ.