"მანჩესტერ იუნაიტედის" მწვრთნელმა, დევიდ მოიესმა ახსნა თუ რატომ არ ათამაშებს ადნან იანუზაის ბოლო პერიოდში ხშირად.
19 წლის ბელგიელმა შესანიშნავად დაიწყო სეზონი. მატას შესყიდვის შემდეგ კი თითქოს ჩანდა, რომ იანუზაის პრაქტიკის ნაკლებობა ექნებოდა. "ოლიმპიაკოსთან" და "ვესთ ჰემთან" იანუზაი სათადარიგოთა სკამზე იმყოფებოდა, თუმცა მატჩში ჩართვა არ მოუხდა. დერბიში კი იანუზაი განაცხადშიც ვერ მოხვდა.
თუმცა მოიესი თავის შეგირდს მხოლოდ უფრთხილდება. იანუზაიმ სულ 29 შეხვედრაში მიიღო მონაწილეობა და ახლა დასვენება სჭირდება. "19 წლის ასაკის კვალობაზე იანუზაიმ დაუჯერებელი რაოდენობის შეხვედრები ჩაატარა. ეს არ უნდა დაგვავიწყდეს. ვარჯიშებზე ვაკვირდებოდით მას და დავასკვენით, რომ მას მოფრთხილება სჭირდება."
"ის გასაოცარი ნიჭის პატრონია. იანუზაი არის ის, ვინც ბევრს მიაღწევს "მანჩესტერ იუნაიტედში". მას გაფრთხილებით უნდა მოვეპყროთ. სწორად უნდა ვიმოქმედოთ და ამას გარდა მან უკვე ძალიან ბევრი ითამაშა." - ციტირებს მოიესის სიტყვებს Sky Sports.