მანჩესტერული დერბის შემდეგ, ჰეშთეგი #MoyesOut ბრიტანულ „ტვიტერზე“ ერთ-ერთი ყველაზე პოპულარული იყო. ამ ჰეშთეგით გამოქვეყნებულ შეტყობინებებში „მანჩესტერ იუნაიტედისთვის“ ახალი თავკაცის მოსაძებნად და კლუბში მოსაწვევად თანხის შეგროვების ინიციატივითაც გამოვიდნენ.

ქომაგებმა კლუბის ხელმძღვანელობას წერილიც მისწერეს, რომელშიც დაწვრილებით არის აღნუსხული დევიდ მოიესის მიერ გაწეული სამუშაოს ყველა ხარვეზი. აღნიშნული წერილის მეშვეობით გულშემატკივრები „მანჩესტერ იუნაიტედის“ ბოსებს სთხოვენ, რომ შოტლანდიელი სპეციალისტი დაუყოვნებლივ დაითხოვონ გუნდიდან.

„იუნაიტედი“ - „ასტონ ვილას“ შორის შაბათს გასამართი მატჩის მიმდინარეობისას „ოლდ ტრაფორდს“ თვითმფრინავი გადაუფრენს, რომელსაც ტრანსფარანტს გამოკიდებენ წარწერით: „Wrong One - Moyes out“. ფანებმა ამისთვის 840 ფუნტი შეაგროვეს.

აქვე ITV ავრცელებს ინფორმაციას, რომ ხვალ "ოლდ ტრაფორდს" მეორე თვითმფრინავიც გადაუფრენს მოიესის მხარდასაჭერი ბანერით.