"მანჩესტერ იუნაიტედის" მენეჯერი, დევიდ მოიესი თვლის, რომ უეინ რუნი უკვე ითვლება "ოლდ ტრაფორდის" ლეგენდად.

რუნიმ, რომელიც მეათე სეზონს ატარებს "მანჩესტერ იუნაიტედში", უკვე მოახერხა 212 გოლის გატანა წითელი მაისურით და გუნდის ყველა დროის საუკეთესო ბომბარდირებში მესამე ადგილზე გადაინაცვლა.

"ევერტონის" ყოფილი ფეხბურთელი ბოლო წლებში ხშირად ეხვეოდა კრიტიკის ქარ-ცეცხლში და მისი მომავალი "იუნაიტედში" რამდენიმეჯერ კითხვის ნიშნის ქვეშ იყო. თუმცა ინგლისელმა ყველა კრიტიკოსს საკადრისი პასუხი გასცა თავისი საოცარი თამაშით და მას მხოლოდ 38 გოლი დარჩა "იუნაიტედის" ყველა დროის საუკეთესო ბომბარდირობამდე.

მოიესი ფიქრობს, რომ ახალი კონტრაქტის გაფორმების შემდეგ, უეინ რუნი კლუბის ისტორიის განუყოფელი ნაწილი გახდა.

"თუ შენ მესამე საუკეთესო ბომბარდირი ხარ ისეთ გუნდში, როგორიც "მანჩესტერ იუნაიტედია", უკვე ლეგენდად ითვლები" -განაცხადა "წითლების" ბოსმა.

"თუ ის მომავალში რაიმე სერიოზულ ტრავმას არ მიიღებს, თავისუფლად შეძლებს დენის ლოუს და ბობი ჩარლტონის რეკორდის მოხსნას."

"უეინი ამ სეზონში საოცარ ფორმაშია და მისი გოლი "ვესტ ჰემთან" ამის ნათელი დასტურია. მან ყველას დაანახა, რომ მას საოცარი შესაძლებლობები აქვს და ჯერ კიდევ შერჩა ძალიან დიდი ენერგია."

"ყველა ვინც უეინს ადრეული ასაკიდან იცნობდა, იტყვის რომ მას ყოველთვის დიდი ენერგია და დიდი გული ჰქონდა, ეს მის თამაშებშიც კარგად ჩანს."

როგორც მოგეხსენებათ ხვალ "იუნაიტედი" საკუთარ მოედანზე მიიღებს თანაქალაქელ "სიტის" და შეეცდება ბოლომდე იბრძოლოს "ჩემპიონთა ლიგის" საგზურისთვის.

"ზუსტად არ ვიცი გადამწყვეტი როლი ექნება თუ არა უეინს ხვალ, ამ მატჩში ბევრი ტოპ კლასის ფეხბურთელი მიიღებს მონაწილეობას, რუნი ნამდვილად მათ შორისაა." - დაამატა მოიესმა.

წყარო: Sky Sports